Heşto peyen, 21 gucige roza zonê dayîke ame “bimbarek kerdene.” Qomê ma na roze ça keno bimbarek ez famnêken. Zonoke qeseynêbeno, zonoke pîl û qicê ma nêzonenê, ça beno bimbarek ke!

Na roze seweta zonê ma raştiye de jê roza yadkerden a û şa giredayen a. Jû cemaatoke zonê xo de edebiyat nênusneno û nêwaneno, o cemaat wayîrê zonî niyo. Jû cemaatoke zonê xo de qayîtê sînema nêkeno, o cemaat bê ayne yo. Jû cematoke tarîxê xo bi zonê xo nênusneno û nêwaneno, o cemaat ravêriya xo nasnêkeno û zonê xo çîno.
Jû cemaatoke zonê xo de felsefe nêkeno, o cemaat bê binge yo. Jû cemaatoke nêwazeno domonanê xo bi zono xo perverde bikero, amayîsê î cemaatî û zonî çîno. Kilmek jû cemaatoke tertele, dez, esq, weşiye û nêweşiya xo bi zonê kolonyalîstan ano zon, o cemaat kolonyalîzm ra nêxeleşiyo, nêxeleşîno û nêwazo bixeleşiyo.Na rîwal ra zî ez bimbarek kerdena na roze famnêken. Heşto peyen mi pît ala kam sene mesajan û bi kamjî zon dano. Her çî onca bi tirkî bî. Bi taybetiye siyasetvananê ma onca mesajê xo leto jede bi tirkî dayî. Waxtoke sîyasetvanê ma bi qîrrayîs û zirçayîs tirkî qeseykenê, mordem riyê înan de esqê tirkî vîneno. Ez bi xo zaf sermayen, waxtoke siyasetvanê ma Kurdîstan de bi tirkî hîtabê qomê ma kenê. Çalakvananê kuçeyan 21 gucige onca mesajê xo bi tirkî dayî û dewlete kerde sucdar. Çalakvanî bi muzîkê kurdî govende cenê, bi tirkî kamerayan de qesey kenê. Çapemeniya kurdanê Bakurî-Azadiya Welat ra qederî-pêro giraniya xo da tirkî ser. Karkerê na çapemeniye zonê xo ra henke remenê, henke seweta tirkî gureyenê, ti vana tirkî roy verde ro û gune bixeleşiyo. Gorê mi, kurdanê bakurî hata ewro hona çapemeniya xo nêafirna. Seke sînema Yilmaz Guney sînema kurdî niya, edebiyatê Yaşar Kemal edebiyatê kurdî niyo, çapemeniya ma zî çapemeniya kurdî niya. Koka jû însanî honde muhîm niya. Jû însan bi kamjî zon gureyeno, î zonî rê çiqas xizmete keno û keno dewlemend, o muhîm o.
Taye hevalê ma endî vanê ‘mesela şoreşî mesela zonî niya’ û niya zonê xora remenê. Bifikriyê ke nî hevalêke niya vanê, zaf bedelî dê û destcikerdîs de seweta zonê xo, kamiya xo kewtê raye. Yê zaf dugelan dezgê xo estê û zonî sero gureyene, taqîb kenê, taye çekuyan vezenê tayîne newe cenê. Ma kurdê bakur zî 30 serrî ra jedero seweta kamiya xo dame pêro. Yê ma zî gune hata nika seweta zonî zu dezgê ma bibiyenê. Her saziya kurdanê bakur alfaba gorê xo ana kar û jûyenî çîna.