Gerîla Erîş Gevero ke nika herêma Lêlikanî de vera hêriş û dagîrkerîya dewleta tirkî de xover dano, eynî wextî de têkoşînê waya xo zî domneno. Çimkî waya ci Adar Gevere 21 serrî verê eynî herême de şehîd kewtbî. Gerîla Gever wina vano: “Cayo ke Heval Adare şehîd kewtbî de têkoşîn dayene, seba mi çîyêko zaf weş o.”

ROJEN FIRAT / SARA XWÎNDA / ANF / XAKURKÊ

Rojhelato Mîyanên de bi hezaran ciwanî seba welat û cuyêka azade vera xo danî koyanê Kurdîstanî. Her keye de tesilî ciwanêk beşdarê PKKyî bîyo, hetta tayê keyeyan ra 3 yan zî 4 waye û birayî beşdar bîyî. Nê keyeyan ra yew zî keyeyê gerîla Erîş Geverî yo.

Erîş Gever dîyar keno ke ê 3 waye û birayî beşdarê gerîla bîyî. Gever nika herêma Lêlikanî ke girêdayeyê qezaya Sîdeka ya de têkoşîn dano. Gever derheqê beşdarbîyayîşê xo û xoverdayîşê Lêlikanî de qisey kerd.

Erîş Gever dano zanayene ke wexto ke waya aye Adar Gevere beşdarê têkoşînî bîya, o hema şenik bîyo û wina domneno: “Her ke ez bîya pîl, ez musaya ke ganî ez vera dişmenî de bihêz biba û hêrsê xo nîşan bida. Pîlanê ma hertim ma rê qala gerîlayan kerdêne. Wexto ke ame vatene ke waya mi zî mîyanê gerîlayan de ya, o wext gerîla hîna zaf eleqeyê mi antêne. Gerîla bîyayîş seba ma xeyal bi û mi bawer nêkerdêne ke ez do bişênba beşdar biba.”

Wayê mi embazê mi yê têkoşînî bî

Erîş Gever dewamê qiseykerdişê xo de wina vano: “Wexto ke waya min a pîle Sîdeka de şehîd kewte, waya min a bîne Adare zî beşdarê gerîla bîye. Êdî her di wayê mi gerîla bî. Her ke şîyêne ez nizdîyê xeyalanê xo bîyêne. Wexto ke ez beşdarê gerîla bîya, ez ameya cayo ke waya mi tede şehîd kewtbî. No goreyê mi tesaduf nîyo. Çimkî enerjîyêk ma antbî tîya. Ez û waya xo şîyê zîyaretê waya xo ya şehîde. Wayê mi embazê mi yê têkoşînî bî.”

Lêlikan de destane nusîyayêne

Erîş Gever qiseykerdişê xo de qala xoverdayîşê Lêlikanî zî keno û wina dewam keno: “Ez nika warê Lêlikanî de ya. Cayê ke Embaze Adare şehîd kewta de têkoşîn dayene, seba mi çîyêko zaf weş o. 21 serrî ra dima cayê ke waya mi şehîd kewtbî de têkoşîn dewam keno. Her ke ez game erzena, ez çîyanê newîyan vînena. Xoverdayîşê Lêlikanî destan nuseno. Embazî her roje çalakîyanê tesîrinan kenî. Her roja Lêlikanî dûştê romanbîyayîşî de yo.”

Dewleta tirkî mehkûmê vînîkerdişî yo

Erîş Gever peynîya qiseykerdişê xo de wina vano: “Destê dewleta tirkî de tena teknîk esto. Embazî binê teyarayanê keşfî ke leşkerê tirkî zaf bawerîya xo pê anî de çalakîyanê tesîrinan virazenî. Wexto ke teyarayê keşfî veng vejenî, desê leşkeran de çîyêk nêmaneno. Wexto ke keşf kenî, ma vînenî. Leşkerî nêşênî meterîsanê xo ra bivejyî. Dagîrkerî qet qezenç nêkerdî. Wa şarê ma bizano ke dewleta tirkî Lêlikan de mehkûmê vînîkerdişî yo.”