Endamê Konseyê Caardişî yê KCKyî Mustafa Karasuyî derheqê weçînayîşê 24ê Hezîrane de qisey kerd. Karasuyî derheqê sebebê qerarê weçînayîşî, prosesê weçînayîşî, netîceyê weçînayîşî û muhîmîya weçînayîşî ser o melumatê muhîmî pare kerdî.
Endamê Konseyê Caardişî yê KCKyî Karasuyî va ‘faşîzmê AKP û MHPyî problemê giranî yê ekonomîk, sîyasî, dîplomatîk, komelkî û sewbîna ver qerarê weçînayîşî girewtî’ û wina domna: “Wina aseno ke do seba qezençkerdişê weçînayîşî heme îmkananê dewlete seferber bikerî. Qerarê weçînayîşê zextkarî rîskêko gird o û îqtîdar seba ke problemanê sîyasî û ekonomîkan derbaz bikero, qumar kay keno. Çimkî heta nika Erdoganî se ra 40 yan zî 42 bigirewtêne, bîyêne îqtîdar. Labelê ganî êdî se ra 50ê rayan bigîro. Cok ra îxtîmalê vînîkerdişî zêde yo. Xora sere de reaksîyonê şarî û sewbîna nîşan danî ke do qezenç nêkero.”
Karasuyî qiseykerdişê xo de qala muhîmîya weçînayîşê 24ê Hezîrane kerd û wina va: “Do bi nê weçînayîşî bedilîyayîşê muhîmî bibî. Eke AKP û MHP bi weçînayîşî îqtîdar ra bikewî, sîstemê înan zî do derbêko gird biwero. O wext baro ke kurd, hêzê demokrasî û sewbîna ser o esto, do sivik bibo. Eke wina bibo, o wext bawerîya şarî zî zêde bena. Qet şik çin o ke faşîzmê AKP û MHPyî do rew a rew fek îqtîdar ra veranêdo û hîleyan bikero. Cok ra tena raydayîş bes nîyo, ganî îradeya wayîrvejîyayîşê sindoqan zî bêro nawitiş.”
Ganî HDP bendê weçînayîşî zaf derbaz bikero
Karasuyî dewamê qiseykerdişê xo de qala hêrişkarîya îqtîdarê AKP û MHPyî kerd û wina va: “Seba ke îxtîmalê vînîkerdişê AKP û MHPyî esto, nêyî ver hîna zaf beno hêrsin. Ganî merdim weçînayîşê winasîyan ra tena sey bedilnayîşê îqtîdarî nêewnîyo, sey merhaleyê têkoşînê demokrasî bivîno û wina nizdî bibo. Cok ra ganî HDP bendê weçînayîşî zaf derbaz bikero û serkewtişêko gird qezenç bikero. Çimkî eke AKP û MHP qezenç bikerî, o wext do heme cîyayîyan ser o zextê girdî bironyî. Yanî do sîstemêko newe bêro awankerdiş û kurd, hêzê demokrasî û heme hetê cîyayî ser o dîktatorîye bêro awankerdiş. Îqtîdar do sey DAIŞî zîhnîyetê xo yê dînî bido ferzkerdiş. Seba vernîgirewtişê nêyî ganî ma no weçînayîş de bibî parçeyê têkoşînê demokrasî.”
ANF/BEHDÎNAN