Partîya Demokratîke ya Şaran (HDP) bi îzehetêko nuştekî, vilaweka çareserîya problemê kurdî aşkere kerde. Îzehet Salona Konferansî ya Vedat Aydinî de ame aşkerekerdiş.
Hemsekera Pêroyî ya HDPyî Pervîn Buldane, Hemserekê KCDyî Berdan Ozturk, parlamenter, namzedê parlamenterîye û xeylê kesî beşdarê îzehetî bîyî. Salone de pankartê ke Kurmancî, Kirmanckî û Tirkî ameybî nuştiş, ameyî aliqnayîş.
Buldane va ’24ê Hezîrane do qederê Tirkîya bibedilno’ û wina domnaye: “Çareserîya problemê kurdî do 24ê Hezîrane de pê bêro. Ma heta nika xeylê pêvînayîşî kerdî û ma bawer kenî ke her pêvînayîşê ma zaf muhîm o. Heme pêvînayîşanê ma de babeta esasî statuyê kurdan bîye. Ma vanî vera îttîfaqê AKP û MHPyî de ma kurdî zî îttîfaqê xo ronî. Qederê Kerkûk û Efrîn, Şirnex û Mehabadî yew o. Ewro roje roja yewbîyayîşî ya.”
Tena ma bawer bikerî bes o
Buldane dewamê qiseykerdişê xo de wina va: “Heta ke problemê kurdî çareser nêbo, problemê esasî yê Tirkîya zî çareser nêbenî. Tarîx ra nata problemê kurdî problemêkê statuyî yo. No zî ancax îdareyê herêmkî reyde çareser beno. Eke HDP bêro do qanûno bingeyîyêko demokratîke reyde heme heq û azadîye bigîryî binê temînatî. Do OHAL bêro wedarnayîş û heme şaredarîyê ke dest ronîyayî ser, tepîya bidîyî wayîran. Tecrîdo ke Îmrali ser o esto do bêro wedarnayîş û hepsîyê nêweşî serbest bêrî veradayîş. Bajarê ke ameyî rijnayîş do newe ra bêrî awankerdiş. Heme dezgeyê dewlete de heqê ziwanê dayîke do bigîrîyo binê temînatî. Cok ra 24ê Hezîrane seba aştîyêka rûmetine hêvî yo. Tena ma bawer bikerî bes o û ganî ma bikewî têgêrayîşî mîyan.”
Kurmancîya vilaweke hetê Parlamentere Feleknas Ucaye ra ameye wendiş û kombîyayîş bi kutişê çepikan qedîya.
MA/AMED