ENES YILDIZ/BERFÎN BAGDU
ANF/BEHDÎNAN
Hemserekê Konseyê Caardişî yê KCKyî Cemîl Bayikî weçînayîşê 24ê Hezîrane ser o qisey kerd û no derheq de hişyarîyê muhîmî kerdî. Bayikî dîyar kerd ke eke faşîzmê Erdogan û Bahçelîyî qezenç bikero, Tirkîya de tehlukeyo ke heme şaran ser o esto, do zêde bibo, cok ra ganî herkes vera nê îttîfaqê faşîstî de hewl bido.
Hemserekê Konseyê Caardişî yê KCKyî Bayikî da zanayîş ke senî ke blokê faşîstî nê weçînayîşî seba xo sey şansêkî vîneno, ganî hêzê demokrasî zî nê weçînayîşî seba zorê faşîzmî berdişî sey şansêk bivînî û wina domna: “Ez veng dana heme sosyalîst, liberal, elewî, kurd û sewbîna ke wa seba ke HDP binê bendê weçînayîşî de nêmano, bi şewe û roje bixebetyî.”
Bayikî qiseykerdişê xo de bale ant ser raştîya Erdoganî ser û wina va: “Erdogan û Bahçelîyî derheqê weçînayîşî de qerarêk girewtî. No qerar, qerarêko normal nêbî. Herkes nê qerarî sey weçînayîşo zextker vîneno û wina nizdî beno. Xora raştîya Erdoganî bi xo derbeyêk o. Erdogan nêşêno bêderbe payan ser o vindero. Cok ra seba îqtîdar de bimano, hertim derbeyan virazeno.”
Çira weçînayîşêko verwext?
Bayikî sebebê weçînayîşê verwextî rêze kerdî û wina va: “Çira qerarê weçînayîşê verwextî girewtî? Ê bi xo zî îtîraf kenî; eke weçînayîşî wextê xo de biameyêne viraştiş, o wext ê do vînî bikerdênê. Çimkî nika rewşa Tirkîya her hetî ra ver bi xirabîye de şona. Nika AKP û MHP ver bi vilabîyayîşî de şonî. AKP û MHP seba ke îqtîdarê xo bidomnî, heme çîyî kenî. Cok ra weçînayîşêko verwext yeno viraştiş. Ê zî zanî do vînî bikerî. Nê weçînayîşê normale nîyî; weçînayîşê gelo do faşîzm qezenç bikero yan zî demokrasî do qezenç bikero? Faşîzm qederê xo nê weçînayîşan ra girê dayo. Cok ra ganî cepheyê demokratîke qezenç bikero. Na çarçewa de ganî heme dînamîkê demokrasî hêzê xo bikerî yew. Kurd, elewî, lîberal, roşnvîr, nuştox, ciwan, cinîye û sewbîna vera faşîzmî de sere wedarnî û qezenç bikerî.”
Eke HDP binê bendî de bimano, faşîzm qezenç keno
Bayikî qiseykerdişê xo de veng da heme namzedan û wina dewam kerd: “Beno ke nê weçînayîşan de tayê kesî namzed nêbî û eciz bibî. Ganî herkes dormeyê namzedan de bibî yew û xo eciz nêkerî. Ganî HDP binê bendê weçînayîşî de nêmano. Eke HDP binê bendê weçînayîşî de bimano, o wext yeno manaya faşîzmê Erdogan û Bahçelîyî qezenç keno. Seba rewşêka winasî nêvejîyo orte, wa herkes têkoşîn bido. Wa heme seba HDPyî bixebetyî.”
Seba bajarê rijîyayeyî, wextê heyfgirewtişî yo
Bayikî qala bajarê ke hetê îqtîdarê Erdogan û Bahçelîyî kerd û wina va: “No weçînayîş seba înan şansêk o, ganî heyfê xo bigîrî. Reyna wa muslumanî zî vera Erdoganî de têkoşîn bidî. Wa demokrat û şarê ma yê Ewropa zî seba ke faşîzmê Tirkîya nêreso serkewtişî, hewl bidî. No het de rolêko gird keweno nuştox, demokrat û hetê sosyalîstî yê Ewropa ser. Wa seba binkewtişê faşîzmî bixebetyî. Bitaybetî muslumanê raştî do vera faşîzmî de bivinderî. Wa cinî, ciwan, liberal, sosyalîst û elewîyî bêrî têhet û zorê faşîzmî bîşêrî. Ez bawer kena ke do zorê faşîzmî bîşêrî. Na çarçewa de ez her kesî silam kena.”