Bitaybetî nê demanê peyênan de vera mezel û goristananê şehîdan de hêrişî benî. Nê hêrişan ra yewe zî vera Goristanê Garzanî ke bajarê Bedlîsî de yo de bî.
Seke yeno zanayîş Goristanê Garzanî de 267 mezelê kesê ke Kobanê de şehîd kewtbî zî tede estbî. Ame musayîş ke 267 cenazeyî bi talîmatê dozgerîye cayê xo ra ameyî vetiş û nîno zanayîş ke cenaze berdî kura.
Nê cenazeyan ra yewe zî ya şerwanê YPJyî Dîlan Bîngole ya. Babete ser o pîyê Dîlan Bîngole Lezgîn Bîngolî îzehetêk da. Bîngole va ‘no goristan sey Şehîdgehê Garzanî yeno zanayîş’ û wina dewam kerd: “Rojanê peyênan de no goristan hetê hêzê ewleyîye ra ameyêne rijnayîş. Mi 18ê kanûna 2017î de muracatê Walîltîye kerdbî. Mi waştişnameyê xo de vatbî ke ‘cenazeya kênaya mi zî ewja de ya. Ez wazena mezelê kênaya xo zîyaret bikera. Gelo ewja de qedexe esto an nê?’. Walîtîye zî seba ke herême kewena berpirsîyarîya cendirmeyan, waştişnameyê mi sewqê cendirmeye kerde. Cendirmeyî zî mi gêrayî û vatî ‘267 cenazeyî bi talîmatê dozgerîye ewja ra ameyî girewtiş û erşawîyayî Dezgehê Tibê Edlî yê Stenbolî rê.”
Cenazeyî kura de yî?
Lezgîn Bîngolî dewamê qiseykerdişê xo de wina va: “Dima ra 20ê kanûne de mi hewl da ke ez şêra goristan. Wexto ke ez şîya ewja mi dî ke heme esteyî mezelan ra ameyî vetiş û ewja de mezelî nêmendbî. Dima ra mi muracatê Serdozgerîya Komare ya Bedlîsî kerd. Herçiqas ke nasnameyê kênaya mi ameyêne zanayîş, labelê reyna zî cenaze seba karê tibê edlî berdî. No nîno qebulkerdiş. Wina aseno ke ma dozêka ke demêko derg bidomîyo, reyde têrî yî.”
ANF/BEDLÎS
