Armanca kurdêy ney gamî, tenê problemêy kurdan hal bikê nîyo. Armanca înan problemêy mazlûmêy dinyaye hemeyan çarçiweya Cuyokraştîya Ekolojîkî de bipawê û hal bikê yo. No kareke zaf zaf giran o zî, labelê kurdan sîngê xo verba heme kapîtalîstan akerdo û dayo guleyê lîberalan ver û ey semedî ra zî merdişêy sivîlan nêy rojan de zafîyayê. Cayo ke sivîlî zî şerî mîyan de bibêy û no sivîlî zî kurd bibî se bêserkewtişî rayîr heram o.
Ewro dewleta TCe tena ney, Îran, Iraq, Sûrîye û heme kapîtalîstêy dinyaye ferasetê ‘kurdîy dijmin êy’ ewnîyenêy kurdan rê. No ferasetê înan ya şaş, zey şidênayişê uranyûmî enerjîya kurdan zêdînayo û zêdîneno. Ma zanêy ke bi no hawa vejyayişê enerjîye nêqedîyeno û enerjîyeke zaf dem derg û bi qîmet û qîmê zafêreya dinyaye û dinyayêy bînan zî biko yo.
TCyî de bêxra partîya HDPe, partîyêy bîn bîyê jû veng û dijminatîya kurdan kenêy û do bikerêy zî. Çimkî tarîx weş bêro wanîyayiş tira encamê esas bêro vejyayiş se, do raşteyeke hinî bêro vînayiş. Tarîxî de her çiqas kurdan mafêy xo waştbêy se zî; tirkan, eceman û netewêy bînan bi heme hezêy xo herîşê kurdan kerdêy û serekê înan ya qetil kerdêy ya zî yesîr girotêy. No feraset wextê ma de zî eynî dewam keno. La ferqeke ci estbîyayiş û paradîgmayê PKKe yê. Hetê bînî de teknolojîye ra feydegirotişê kurdan o. Yanê kurdîy şikyenêy xebereke çend deqeyan de vilayê dinyaye bikerêy û bi enerjîya ûranyûmê xo qûantûmê mezgê xo bixebitnêy û bi no hawaye şikyayê û şikyenêy zaf çîyê dijminan berteraf bikerêy.
Çekeke giran ya kurdan a zaf muhîm no gam zey tora maseyan de tepişyaye bo, zî esto. No zî verba qanûnêy ke kurdan kerdêy dafikan xirabekerdiş o. Semedo ke kurdîy torî ra bivejyê lazim o ke weçînayişê 1’ê Teşrîne de TCyî de do bibo de kurdîy serkewtişeke zaf gird bigêy. Eke 2’ê Teşrîne de encama weçînayişî dormeyê ney hawayî de; AKP seyî ra 32, CHP 30, MHP 12, HDP zî seyî ra 21 bivejyo se, kurdan ra rîpeleke saye ke kurdîy bidestê xo do bişikyê mafê xo binexşnê û binusnê abibo.
Eke 2’ê Teşrîne de encameke nêzdî encamêy corin bivejyo se, kurdîy tenê cuyokraştîya xo nê, ya mazlûman zî nê, semedê cuyokraştîya fezaye do bi awayeke ekolojîk bidê cuyayişî ra dinyaye de serkeşeya azadî û aramîyî bikerêy. Do hinî bibo ke kurdîy rayîrê Konfederalîzmê Cuyokraştîya ke Birêz Ocalanî akerdbi de zaf rayîr bigerêy û çend serrêy ma ver de yew bi berêy cuyokşratîyî abibêy. Verba kapîtalîzmî ke demokrasîya rizyaye û pûç bîyo têkoşîneke newe rîpela xo ya saye de biderêy destpêkerdiş û do demeke zaf kilmî de, bi ser bikewî.
Yanê kurdîy do wezîfeya Qawayê Asinkarî rayeke bîn dibare bikerêy û dinya û fezaye Dehaqêy ke demokrasîyî fekê xo de zey qanikeke cawitê binerd bikerêy.
Encamê ke 2’ê Teşrîne de bivjeyo de, lazim o dek û dolabêy nêbî. Çimkî Dehaqê Qesra TCe semedo ke têkşîyişî qebûl nêkeno ra, heme dek û dolaban do bixebetno. Verba ney de zî lazim o ke ma kurd û mazlûmêy dinyaye heme kar û barê xo na gamî ra, bi enerjîya ûranyûmî paradîgmaya cuyokraştîya fezayî û raşteya aramî û aştîya merdimatî bixebetno.
Ehmedê BIRA