ALÎ ŞEKER / PÎRHA / DÊRSIM
Dewa Altun Huseyînî ke 16 mezrayê ci estî û girêdayeyê qezaya Pîlemurîye ya Dêrsimî ya zî serra 1994î de netîceyê veşnayîşanê dewan de xeylê koçî dayî. Yê ke koçê bajaranê girdan kerdbî, bi bêrîkerdişêko gird paweyê agêrayîşê dewanê xo yî. Nînan ra yew zî Şukru Ariyo 69 serreyî yo. Ari 4 aşmî yo ke dewa xo de çadire ronaya û paweyê qedênayîşê banê xo yo. Ariyî 7 hezar TL dayo rayîrê dewa xo viraşto.
Ariyî dîyar kerd ke 31 serrî yo ke dewe veng a û wina va: “Merdiman bi vatişê ‘teror esto, ewleyî û heşî estî’ tersnenî û xapênenî. Wa dewijî bêrî wayîrê mezel, zîyar û erdanê xo bivejyî. Ters ti kesî aver nêbeno. Hetê Pîlemurîye de dewî veng î. Dewa ma de heme çî esto. Her tewir nebat esto û heme nêweşîyan rê baş î. Ma zaf zehmetî ancenî. Ma rê rayîr û cereyan lazim î. Eke ma bibî yewe û muracat bikerî, ma eşkenî hal bikerî. Tîya de şekirê mi 170 ra kewto 105. Ez tîya de dermananê tansîyon û sewbîna zî bikar nêana. Ma Stenbol de xeniqîyenî.”
Keso ke înşaat de xebetîyeno zî wina va: “Armancê ma ganîkerdişê tebîetî yo. Tîya de çi cereyan û çi zî rayîr esto. Ma nêşênî nan biwerî. Seba ke cereyan çin o, ma nêşênî çîyî werdî bîyarî. Tena toraq, nan, zeytûn û sewbîna. Ma wazenî wa dewlete cereyan bîyaro tîya. Reyna ma wazenî wa dewijî biagêrî, tîya de çîyo ke merdim tira biterso, çin o.”