11ê Tebaxe de qezaya Geverî ya Colemêrgî de pêrodayîşêk vejîyabi û netîceyê pêrodayîşî de endamê HPGyî Muhammet Emîn Demîr (Denîz Agirbaz) şehîd bibi. Cenazeya Demîrî hîna zî nêdîyaya keyeyê ci. Herçiqas ke keyeyê Demîrî cenazeya lajê xo tespît kerdo zî cenaze nêdîyeno keyeyî.
Pîyê Demîrî Mûrat Demîrî dîyar kerd ke no proses de ma raştê zextanê psîkolojîkan yê dewlete ameyî û wina domna: “Mi 18ê Tebaxe de televizyon de dî ke lajê mi şehîd bîyo û ez 21ê Tebaxe de zî musaya ke cenazeya lajê mi morgê Colemêrgî de yo. Ez seba ke cenazeya lajê xo bigîra, mi muracatê dozgerîye kerd. Ma heta nika 4 reyî şîyî Colemêrg, labelê ma heta nika ti netîce nêgirewt. Herçiqas ke heta nika 36 rojî derbas bîyî zî ma hîna cenaze nêgirewta.”
Pî Demîrî da zanayene ke înan heta nika muracatê xeylê dezgehan kerdo û wina dewam kerd: “Ma raştê zextanê psîkolojîkan yê dewlete ameyî. Polîsan ma tacîz kerd. Înan Colemêrg ra heta Bitlîs ma taqîp kerd. Înan wesayîtê ma vindarna, verê va ‘narkotîk o’ labelê dima ra vejîya werte ke înan ma taqîb kerdo. Wazenî ma bitersnî û ma ser de tesîr bikerî. Ê wazenî ke keyeyî zehmetîyan mîyan de verdî. Ti dîn û bawerî de çîyêko winasî çin o. Nêverdanî ke Kurdî domananê xo rê salayêk zî biwanî û destûr nêdîyenî tazîyeyan. Reyna destûr nêdîyenî ma camîyan de meyîtanê xo bişiwî. Camî keyeyê Homayî yo û ê ma hemînan o. Ma wazenî domanê xo defin bikerî û tazîyeya xo ronî. ”
MA / AMED