Tertelê Dersîmî ser ra 76 serrî vêrdî ra. Her serre na dem ke ame, herkes gorê xo çalakiyan virazeno û şehîdanê 38 yad keno. La raştiye de leto jede yê sarê Dersîmî na mesela tam famnêkerda. Eke fambikerdenê, ewro mesela teyna bi yadkerdene nêmendenê. Seweta taye dersîmizan hona dismen kam o, qetilkar kam o, zelal niyo. Taye dersîmizî Ataturk û CHP jê qetilkarê kalik û bavikê xo nêvînenê. Ya kî nî zerre ra mîlîsê dewleta tirkî yê. Nînan miyan de kokimî, hunermendî, şaîrî, roştberî û siyasetvanî estê.
Kokimanê ma xo rê jû zuro bêçever pêda kerd bî: Vatenê milet kerd bî top, dorme de ağir makîneyî nayî bî ro. Wastenê pêroyîne qirkerê, la ma reye niyada ke ha diyar ra jûyo aspor vejiya, desmala sipiya dest de ame û vat, Ataturk ferman do, ahalî raverdê, axleru berê... Kokimanê ma ebi na zur pê xo xapit, ma kî ebi tarîxêde xeletî têrî de verdayîme. Çi beno bibo, nî vatîsê kokimanê ma koke ra zur yê. Dersîm de 70 hezar însan ameyî qirkerdene. Zoneme ke Dersîm de o waxt ne 70 hezar axlerî estbî, ne kî 70 hezar xoverdayoxî. Xo vîra mekerîme, Dersîm de ahalî ame qirkerdene. Hekata desmala sipiye û asporî kî her hetê Dersîm de yena qeseykerdene, aynî ya. Na kî yena o mane ke, na propaganda dewlete ya. Bi na tore Ataturko qetilkar û CHP biyê “melekê xelesnayena” Dersîm.
Taye hunermendê ma 38 sero kilaman vanê, la lewê CHP de cayê xo cenê. Nî vanê: CHP ya ewroyene yê î waxtî niya, serokê xo dersîmiz o, wazeno CHP biyaro cawode rind. Hama jû raştiye esta ke, CHP o waxt tek partiye biye, Ataturk bi Îsmet Înonu ra piya planê Tertelê Dersîm virast û ard ca. Nî hunermendî kî zurkenê û şîzofrenî yê.
Onca taye şaîrê dersîmiz kî Tertelê Dersîm sero şîîran nusnenê, la siyasetvananê CHP de dost yê. Gorê nînan kî nî dostê xo yê CHPyizî mordemê rind yê, xiravin CHP ya û Ataturk o. Siyasetvanê CHP yê ewroyî kî CHP pawenê û kerdîsanê ci rê wayîr vejînê. Jû CHP ya ke kalik û bavikê ma qirkerdê, hata ewro ma ra leborîna xo nêwasta, siyasetvananê aye de çitur dostenî bena, naye kî ma gune nî şaîran ra perskerîme. Na kî ma rê şîzofreniya şaîr û nustoxanê ma kena werte.
Nika yardimkarê serokê CHP Sezgîn Tanrikulu vejiya vat: “Kam ke rîwalê Tertelê Dersîm ra dez onceno, ey ra bi namê CHP leborîna xo wazen.” Pekî leborîne niya wajîna? Bêcîddiyetiya CHP reyna vejiye werte. CHP onca AKP taklît kerde. Çike serokwezîrê tirk kî vat bî, eke lazim o, bi namê dewlete ez leborîna xo wazen. Na gostarmenî ya. Wayîrê şerefê xiravinî pê dirvetanê ma kaykenê.