BÊRÎTAN MEDUSA / SOZDAR XELÎL / ANHA / HESEKÊ
Bajarê Serêkanîyê yê Rojawanî de kurd, ereb, çeçen, suryanî, armenî û çerkesî pêro pîya cuyenî. Merdim eşkeno vajo ke bajar de heme rengê Rojhelatê Mîyanênî mîyanê yewbînî de yî. Dewa Til Xenzîrî ya bajarî de zî ereb û êzidîyî pîya cuyayênê. Labelê hêrişê çeteyan ra dima êzidîyî mecbûr mendbî ke dewe biterknî. Nika tena keyeyêkê êzidîyan esto.
No keye de cinîya bi nameyê Fatma Tîo cuyena. Fatma Tîoya 54 serrî, 40 serrî verê zewijîyena û yena na dewe. Fatma ameyîşê xo ra dima Emîne Hesena ke ereb a, şinasnena û benî embazê yewbînî. Nê her di cinîyî o wext ra nata yewbînan ra nêqerfîyayî û 40 serrî yo ke embazê yewbînan î.
Lajê Fatma wexto ke leşkerîya rejîmî kerdêne hetê çeteyan ra kişîyeno û lajê Emîne zî wexto ke mîyanê YPGyî de vera çeteyan de şer kerdêne, şehîd keweno. Her di cinîyî zî lajanê xo Serêkanîyê de defin kenî. Fatma Tîo qala embazîya înan kena û wina vana: “Ma hertim pîya yî û destek danî yewbînan. Wexto ke ma têhet de nêbî, karê ma safî nêbeno. Ez nêwazena na dewe ra bivejîya, çimkî hem keyeyê mi tîya de yo û hem zî mezelê lajê mi na dewe de yo.”