Hemserekê Şaredarîya Bajarê Girdî ya Amedî Selçûk Mizrakli yo ke herinda ci de qayûm ame tayînkerdene, Hemsereka Şaredarîya Peyasî ya Amedî Kezîban Yilmaze, Hemserekê Şaredarîya Bismilî ya Amedî Bismilî Orhan Ayaz û Gulcan Ozere û Hemsereka Şaredarîya Karazî ya Amedî Rojda Nazliere ameyî tepiştene.
Çarçewaya operasyonê qirkerdişî de polîsan eşt keyeyanê 5 hemşaredaran ser û sehnayîşê keyeyan ra dima hemserekî Mizrakli, Yilmaze, Ayaz, Ozere û Nazliere ameyî tepiştene. Reyna polîsan derûdorê şaredarîyanê Karaz, Peyas û Bismilî zî girewt binê ablûqa. Ame vatene seba ke ‘Do qayûm bêro tayînkerdene’ îdarekarî û persenolê Peyasî nêgirîyayî banê şaredarîye.
Badê ke hemşaredarî tepişîyayî ablûqaya derûdorê şaredarîyan dewam kena. Parlamenteranê HDPyî yê Amedî Dersîm Dage, Salîha Aydenîze û Remzîye Tosûne seba piştîdayîşî şîyî Şaredarîya Peyasî. Aydenîza ke ablûqaya polîsan rê hêrsê xo arde ziwan, wina va: “Şima dest na şaredarîyanê şarî ser. Seserre yo ke no zulm dewam keno, la çîyêk nêbedilya. Ma her tim tîya de yê la şima bedilîyenî. Ma heta peynî do xover bidê û ser bikewê. Şima tewr peynî do bin bikewê.” Qiseykerdişî ra dima şar û xebatkarê ke verê banê şaredarîye de ameybî pêser, bi tîlîlî û siloganan kewtî şaredarî. Banê şaredarî de cigerayîşê polîsan dewam keno.
Riha de zî 30 kesî tewqîf bîyî
Heto bîn de Riha de 54 kesê ke ameybî tepiştene, înan ra 30 kesî ameyî tewqîfbîyayene. 9ê Teşrîna Verêne, roja destpêkerdişê operasyonê dagîrkerdişî yê vera Rojawanî de Riha de polîsan eştbi xeylê keyeyan ser û pêro pîya 54 kesî tepiştbî. Nînan ra Hemsereka Şûbeyê Egîtîm Senî Leyla Mumîne, nêweşê rîşa merdimwere Mahmût Korkmazer û maya Mehmet Yavûzerî ke xoverdayîşê Cizîrî de şehîd bibi, Hanim Yavûzere zî tede 30 kesî ameyî tewqîfbîyayene.
AMED