Girotxaneyanê Tirkîye de 560 domanê qijkek bi dayîkanê xo zîndanan de yê. Pîyê Mîrazî Cengîz Zaza Akbabayî vist vîrî ke Mîraz û Gulistane 4 aşmî yo ke zîndan de yî û va, Tirkîye de edalet tena bîna û qesra Tirkîya de esto.
Badê ke Parlementerê CHPyî yê Stenbolî Enîs Berberoglu ame tewqîfkerdiş, Serekê Pêroyî yê CHPyî Kemal Kiliçdaroglu Anqara ra heta Stenbolî dest bi meşîyayîşê edalatî kerd. Meşîyayîşê edaletî ewro kewt roja xo ya 8. Hemwelatîyê Stenbolî çarçeweya meşîyayîşî de Parka Beşîktaş Maçka Demokrasî de dest bi nobeda edaletî kerdî. Kesê ke raştê neheqî ameyî, nobete de qala neheqîyê ke dîyî kenê û edalet wazenê. Înan ra yewe zî keyeyê Gulistan Akbabaya ke bi bebeka xo ya 7 aşme Mîrazî reyde 19 sibate de ameybî tewqîfkerdiş û Zîndanê Cinîyan yê Bakirkoyî ra surgunê Zîndanê Cinîyan yê Gebze bîybî yo.
Mîraz û Gulistane 4 aşmî yo ke zîndan de yî
Babete ser o pîyê Mîrazî Cengîz Zaza Akbabayî qisey kerd. Akbabayî wina va: “Mîraz û Gulistane 4 aşmî yo ke zîndan de yî. Edalet tena bîna û qesra Tirkîya de esto. Roja ma ya ewro 560 domanê ke dayîkê xo reyde zîndan de yî estî. Zîndanî cayê domanan nîyî. Ma mexdurê bêedaletî yî. Parlementerê HDP û CHPyî bi desan reyan rewşa Mîrazî berdî meclîs. Eke wina bibo ma do her ca de çalakîyan bivirazî. Ma na rewşe qebul nêkenî û nêdanî qebulkerdiş.”
DÎHABER/STENBOL