Qezaya Sûrî ya Amedî ke 104 rojî tede pêrodayîşî dewam kerdî de keyeyê ke domanê înan pêrodayîş de şehîd kewtbîy, seba ke cenazeyanê xo bigîrî bi rojan nobete tepiştbîy. Labelê keyeyê ke hîna cenazeya xo nêgirewtî zî estî. Nê keyeyan ra yewe zî keyeyê Hakan Arslanî yo. Hakan Arslan 22ê Çileyê 2016î de Sûr de resabî şehadet û keyeyê ci 572 rojî yo ke cenazeya xo gêreno. Badê ke kesê ke Sûr de ameyî tehlîyekerdiş û ameyî tewqîfkerdiş, goreyê malumatê nê kesan cenazeya Arslanî kişta Camîyê Hasirli de ameyo definkerdiş. Muracato ke keyeyan seba Wezîrîya Karê Zereyî, Walîtîya Amedî û Serdozgerîya Komare ya Amedî kerdbîy bi mehneya ‘Verê cû ewja de xebata gêrayîşî ameya kerdiş û çîyêk nêameyo dîyayîş’ ame redkerdiş. Keyeyê ke cenazeyanê domananê xo netîceyê çalakîya nobete de girewtbîy, keyeyê Arslanî ke qezaya Qereyazî ya Erziromî de maneno, zîyaret kerdî. Babete ser o endamê keyeyan qisey kerdî.
Wa mezelê ci bibo
Dayîka Hakan Arslanî Melîke Arslane va ‘ez 20 aşmî yo ke lajê xo gêrena. Wa êdî hesretîya mî biqedîyo. Mi lajê xo bi hawayo sax nêdî, qe nêbo cayo ke rakewo ez bivîna. Ez hesretîya kulmêk herre û mezelêkê ya. Êdî wa mezelêkê lajê mi bibo.”Pîyê Arslanî Alî Riza Arslanî zî va ‘her çiqas ke 572 rojî derbaz bîyî zî cenazeya lajê mi nêameye dîyayîş’ û wina dewam kerd: “Ez bi desan reyan şîya Amed û mi muracatê heme cayî kerd. Ez bawer kena hîna zî cenaze Sûr de ya. Eke dewlete nêvejena wa destûr bida ez vejena.”
Dej yê ma hemînan o
Dayîka Rozerîn Çukure Fahrîye Çukure zî va ‘ma netîceyê nobeta bi aşman de cenazeya xo girewt’ û wina dewam kerd: “Ma seba parekerdişê dejî ameyî tîya. Ma sey keyeyê ke Sûr de domananê xo vînî kerdî, nobeta xo nêqedênayo. Ma verê zî û nika zî vanî. Heta cenazeya peyêne do nobeta ma bidomîya. Sûr keye û dewa ma yo. Wa Sûr biakerî ma şêrî cenazeya xo bigîrî.”Pîyê Rozerîne Mustafa Çukurî zî va ‘nizdîyê 2 serrî yo ke cenazeya Arslanî Sûr de yo û no seba keyeyan dejêko zaf gird o’ û wina dewam kerd: “Cenazeyê kênaya mi û yê Ramazan Ogutî netîceyê kinitişê 3 hewteyan de vejîya orte. Çimkî cenazeyî kûr de ameybî definkerdiş. Ma dewlete ra çîyêk nêwazenî, wa destûr bidî, ma şêrî cenazeya xo bigîrî.”Waya Mesut Sevîkteke Guler Sevîkteke zî va ‘ma bi rojan ra dima şêna cenazeya xo bigîrî’ û wina domnaye: “Cenazeya Arslanî hîna Sûr de ya û no zaf ma dejneno.Wa destûr bêro dayîş, keye cenaze bigîro.” Tewr peynî Sereka MEYA-DERî ya kehen Ayşe Dîcle zî wina va: “Keyeyê domananê xo Sûr de vînî kerdî, dejê xo kerdî ortax. Ganî seba vindarnayîşê şer û kêmîkerdişê dejan herkes mîyanê hewldayîşî de bibo.”
ERZIROM