Roje çin a ke bê qewimîyayîş û hêrişan bivîyarî. Badê teqîyayîşê Stenbol û Kayserî îdarekarê hukmatî bi parekerdiş û mesajanê xo HDPyî kerdî hedefê hêrişan. Dima ra zaf bajaranê Tirkîya de kurdî bîyî hedef. 12ê kanûne ra nata 59 awanîyê HDPyî raştê hêrişan ameyî. La seba ke ti kes nêame tepiştiş, hêrişî her ke şî hîna girdêr bî. Komîsyonê HDPyî vera hêrişan de amadekarîya gerreyî kenî.
Babet ser o Parlementerê HDPyî Ertugrul Kurkçuyî qisey kerd.
Cepheyê têkoşînî
Kurkçuyî qiseykerdişê xo de wina va: “Ma seba ke vera rejîmê Serekîye de vindenî, benê hedefê hêrişan. Her hêrişê HDPyî parçeyêk planan î. Badê her qiseykerdişê Erdogan û Soyluyî, partîya ma bena hedefê hêrişan û badê her munaqeşeyê pawitişî, vera awanîyê HDPyî de hêrişê plankerde virazîyenî. Heme hêrişî bêhuqûqî yî. Wina aseno hêrişê ke vera ma de virazîyenî do ameyoxe de hîna bibo zaf. Vera hêrişan de ganî heme hêzê demokrasî bibî yewe. Eke cepheyê xoverdayîşî de HDP tena bimano, do lekeyêka sîya bivîyaro ripelanê tarîxî. Wexto ke wina bibo vera faşîzmî de têkoşîn nêbo. Heta nika tena veradayîşê HDPyî çîyo ke zaf şaş o. Ganî ma bi hawayêk bihêz û dînamîk hereket bikerî. Ma şaşîyê înan qebûl nêkenî. Ma do vera hêrişan de cepheyê xoverdayîşî de ca bigirî.”
AMED