5ê Nîsana 2017î de qezaya Tetwanî ya Bidlîsî de mabênê gerîla û artêşa tirkî de pêrodayîş qewimîyabî û netîceyê pêrodayîşî de gerîlayo bi nameyê Ridvan Demîragaç şehîd kewtbî. Cenazeya Demîragaçî bi qerarê dozgerî Goristanê Bêkesan yê Tetwanî de amebî definkerdiş.
Keyeyê Demîragaçî seba testê DNAyî nimûneyî dabî û herçiqas ke netîce de dîyar bîbî ke cenaze aydê Demîragaçî yo, labelê 7 aşmî yo ke cenaze nêdîyena keyeyî. Babete ser o dayîke Halîye Demîragaçe qisey kerde.
Dayîke va ‘herçiqas ke ma 2 reyî seba testê DNAyî nimûneyî dayî û netîce dîyar bîyo zî, cenaze nêdîyena ma’ û wina dewam kerde: “No zulm o. Çira merdeyî ra tersenî? Çira cenazeya ci nêdanî? Pî û birayê ci muracatê Serdozgerîya Tetwanî kerdî, labelê cenaze nêdîya.”
Ez esteyanê lajê xo wazena
Dayîke dîyar kerde ke tena yew waştişê aye esto, o zî girewtişê cenazeya lajê xo yo û wina domnaye: “Eke estî wa esteyanê lajê mi bidî mi. Kura de beno wa bibo, ez wazena esteyanê lajê xo defin bikera. Destê ma de netîceyê testê DNAyî zî estî, labelê cenazeyanê ma nêdanî. Îqtîdar hertim ser dînî ra propaganda keno. Çi dîn û çi zî şerîat çîyêko winasî qebul nêkeno. Ê goreyê dînî nê, goreyê qanûnan hereket kenî. Wexto ke yew merdim merd, kam beno wa bibo, ganî ma rêze nîşanê ci bidî. Ez wazena wa mezelêkê lajê mi bibo, ez bişêna roşanan de ser de duayêk bikera.”
MA/WAN