Heya! Nika niya vanê: Danê piro vindenê, nêremenê.
Stratejîst, sîyasetvan û zaf rojnamevanê tirkî, niya vanê. Riyê xo çîno ke bisermayê.
Her tim vatenê: Ewro qeneme, meste qedeneme, Peyniya PKK nejdiya. Nika stratejîstê tirkî xora persenê: Şemzînan de se beno? Vanê: Dewleta ma zonayîs ma nêdana, naye ra avê eskerê ma niya nêbî, nika ça pêrodayîşî honde derg ramenê.
Nî stratejîstan, siyasetvanan û rojnamevanan PKK qeyta famnêkerde.
Gerîlla çitur dana pêro, key dana piro sona, key dana piro û dana piro, nêremena, qeyta famnêkenê.
Hewnê xo qedenayene û teslîm guretene sero bî. Coka nika tenge oncenê. 30 serrî yo.
Sermiyanê tirk yê siyasî vanê: Ma zoneme Şemzînan de se beno, hama nêvame. Ça biyayîsan hometa xora nimnenê, ma naye zoneme. Çike stratejî û taktîkê xo yê hata nikayenî bî têser û têbin ra.
Dewleta AKP dugelanê rojavan ra poşt guret bî, wastenê hereketê serbestiya Kurdan xan û xirave kerê. Nika no siyaset bî xirave. Coka zonayîs homete nêdanê, morê merdanê eskera nêkenê. Polîtîka dismeniye yê AKP yê verva Kurdan, Şemzînan de teqê û siyasetê AKP hencir pincir kerd. AKP sas biya.
Peyniya xo çi bena bibo, no herb o.
Gerîllayê HPG 28 serrî ra tepiya cerayî ra ameyî, onca aynî nuxtade dapiro. Şemzînan û Eruh de. Manê na çalakî zaf girs û xoriy o.
Stratejîst û siysetvananê tirk hata nika bi koçike qefçiliye werdenê, nika gune bi kundêz borê.
Kam ke na hal famkeno, gune mesela halbikero, kam ke na hal famnêkeno, o peyniya xo ano. Hurdemena hal zî cirê xêr bê.
Polîtîka AKP yê Suriye zî rijiye. Qomê tirk hata ewro nêzoneno, teyara xo 22ê hezîrane de kam û bi çinayî da waro. Xo herb rê kerdenê amade, nika biyo xayîs hukumatê Anqara.
Erdogan nî rozan de derdê rojavayê Kurdistan gureto. Zorê xo kesê bînî nêsono, sono Kurdan. Erdogan vatenê, Esad qomê xorê zulum keno, serbestiye ci nêdano. Erdogan kam rê serbestiye wastenê? Çiye eskera wo: Kurdan rê serbestiye nêwazeno û Esad ra zaferî zulumkar o. Mesela Rojavayê Kurdistan zî xêreser ey dest de teqena. Kurd ke hebena bi aqil hereket bikerê, polîtîka Erdogan sarê ey wena.
Ma gune endî na ciranê neq ra xatir biwajîme. Teyna bi çekan her çî halnêbeno.
Naye ra tepiya her nustîsê xo de no paragrafo ceren nusnen. No sloganê min o.
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsanê bi zonanê kurdî bide.