Kenan KIRKAYA / ANQARA - DÎHABER
2 rojî verê rojnameyê Mîllîyetî de xebera awanbîyayîşê Merkezê Koordînasyonê Rewşa Leze û Ewleyî (GAMER) derbaz bîyêne. Sey sebebê awanbîyayîşê GAMERî zî teşebusê derbe, hedîseyê terorî, krîzê ekonomîkî, hêrişê sîberî û sewbîna çîyî ameybî nîşandayîş. GAMER goreyê perspektîfo ke 12ê nîsana 2017î de ameyo vetiş, awan bîyo.
Awanbîyayîşê GAMERî ra dima do bêtel, malumat, dîmen, telefon û sewbîna heme çîyî bêrî taqîpkerdiş. Do bînayê rayapêroyî, rasteyê teyarayan, lîmanê keştîyan, cayê lojîstîkî, herêmê sanayî, cayê dayîş û girewtişî, tesîsê enerjî, stadyum, merkezê kultur û kongre, otel, pansîyon, yurdê wendakaran û sewbîna cayê ke merdimî bi hawayo komkî tede estî, do heme bêrî taqîpkerdiş.
Goreyê mekanîzmaya xebate ya GAMERî, Fermandarîya Pêroyî ya Cendirmeyan, Ewleyîya Behrî, Mudurîya Asayîşî, Musteşarîya Ewleyî û Nîzamê Rayapêroyî, Mudurîya Pêroyî ya Îdareyê Koçî, Mudurîya Pêroyî ya Karê Welatî û Nufusî, Yewîyê Merkezê Wezîrîye zî do çarçewaya na xebate de bibîy. Reyna çarçewaya na xebate de ‘sîstemê îstîxbaratî’ zî yeno awankerdiş. GAMER eynî wextî de JÎTEMo ke 1987 de awan bî û EMASYA ke 97 de awan bî zî mîyanê xo de hewêneno. Serra 1987 de Serekîya Îstîxbaratî ya Fermandarîya Pêroyî ya Cendirmeyan ra girêdaye JÎTEM amebî awankerdiş û na çarçewa de 17 hezar û 500 cînayetê ke kerdoxê înan dîyar nîyî ameybî cuyayîş.
Dima ra EMASYA awan bîye
JÎTEM ra 10 serrî dima na rey Protokolê EMASYA erzîya dewre. Protokolê EMASYA wexto ke lazim bibo hêzê lşker û polîsî senî keweno dewre, nîşan dano. AKP nê protokolî serra 2010î de seba ke derbe rê zemîn amade keno, wedarna. Hetta Erdoganî vatbî ‘Protolêko winasî nêbeno, ma do biqedênî’. Protokol ame wedarnayîş labelê çend hukmê ci mîyanê Qanûnê Ewleyîya Zereyî de ameyî bicakerdiş.
Ocalanî nê rojan dîbî
Rayberê Şarê Kurd Abdullah Ocalanî betalkerdişê EMASYA ra dima pêvînayîşê xo de wina vatbî: “Gladyo wextê Tansu Çîllere de bîye xoser. O wext vera Gureşî de ecizîyê girdî estbîy. Eynî Gladyo dima ra Ecevîtî tasfîye kerde. 2002 û 2004 de polîtîkayanê parçekerdişî meşnayî. AKP û Gladyo vera kurdan de pîya hereket kenî. Wina aseno ke AKP kesê ke teber de yî û nêwazenî problemê kurdî çareser bibo reyde Gladyoya xo awan kerdo. Her çiqas ke wina aseno ke o kesanê ke vera çareserî de yî tasfîye keno, raştîya xo de wina nîyo; o ê kesan reyde pê kerdo.”