Endamê Konfederasyonê Sendîkayan yê Karkeranê Şorişgeran (DÎSK) seba ke Serekê Pêroyî yê DÎSKî yo kehen Abdullah Başturkî yad bikerî, Goristanê Zîncîrlîkuyu yê Stenbolî de ameyî têhet. Yadkerdişî de seba Abdullah Başturk û heme şorişgeranê kedkaran rêze ameye girewtiş.
Serekê Pêroyî yê DÎSKî Kanî Beko û Serekê Pêroyî yê Sendîkaya Genel-Îşî ya DÎSKî Remzî Çalişkanî merasîmê yadkerdişî de qisey kerdî.
Ma bedel danî
Serekê Pêroyî yê DÎSKî Bekoyî qiseykerdişê xo de va ‘çîyê ke ewro ma rî bi rî manenî, ti cîyayîya înan derbe reyde çin a’ û qiseykerdişê xo wina domna: “Dîktatorîya 12ê Êlule nêşîna ma teslîm bigira, ewro bi OHAL zî nêşkenî teslîm bigirî. Ma ewro bedelê polîtîkayanê şaş yê Rojhelato Mîyanênî danî. Nê erdî êdî gonîye nêwazenî. Betalî kar pawenî, karkerî seba taşeronî kadro pawenî û nêwazenî ke cînayetê karî de bimirî. Labelê Meclîs Serekîye reyde eleqeder beno.”
Çalişkanî zî dîyar kerd ke ma do mîraso ke Abdullah Başturkî ma rê verdayo, bidî ciwîyayîş û va ganî hêzê ke hetgirê demokrasî û kede yî, bêrî têhet.
Merasîm bi ronayîşê vilikan qedîya.
Abdullah Başturk kam o?
Abdullah Başturko ke 25 serrî verê (21ê kanûne 1991) merdbî, ciwîyayîşê xo de wezîfeyê Serekîya Pêroyî ya Sendîkaya Genel-Îşî, Endamê Heyetê Îdareyê PSI, Endamê Heyetê Îdareyê ASK/ETUCî, Parlamenterîya 3 doneman û Awankarîya Partîya Kede ya Şaran (HEP) kerdbî.
STENBOL