Bi nizdîbîyayîşê referandûmî kay û hîleyê hukmatî zî vejîyenî raste. Lîsteyê weçînitoxan ke hetê Heyetê Weçînayîşî yo Berz (YSK) ra ameyî amadekerdiş de nameyê sûrîyeyijê ke şerî ver amebî Tirkîya zî estî. Nameyê sûrîyeyijan lîsteyê 9 taxê qezaya Sûrî ya Amedî ke qedexe tede çin o de ameyî nuştiş. Babete ser o muxtaro ke nêwaşt nameyê xo bido dîyar kerd ke o na rewşe Qeymeqamîya Sûrî rê nuşto û wina va: “Ma selahîyetdaranê Qeymeqamî reyde şîyî lîsteyan kontrol kerd û nizdîyê 30 nameyanê sûrîyeyijan lîsteyan ra vet. Labelê selahîyetdaran mi ra vatî ke tayê keyeyê ke bîyî welatî eşkenî rey bixebetnî.”
43 keyeyî xirabeyêk ser adres nîşan dayî
Nê sûrîyeyijan ra 43 keyeyê ke 15ê ci eynî keyeyan de manenî, xirabeyêk sey adres nîşan dayî û qeydê xo wina viraştî. Rewşa normale de wexto ke bedilnayîşê adresî bêro viraştiş, ganî muracatê muxtarî bêro kerdiş. Muxtar forumêk dano keso ke muracat kerdo rê. Badê ke forum ame pirrkerdiş, o wext Mudirîya Nufûsî de muracat yeno kerdiş. Labelê sûrîyeyijan qet muracatê muxtaran nêkerdo û raşteraşt Mudirîya Nufûsî de qeydê xo viraştî.
Lîsteyan de 690 keyeyî orte de çin î
Heto bîn ra lîsteyê weçînitoxan de 690 keyeyê ke Weçînayîşê 1ê Teşrîna peyêne de rey xebetnaybî nameyê înan çin o. Nînan ra tayê seba ke taxî ameybî xirakerdiş, cayê înan ameyî bedilnayîş. Labelê zafaneyê înan her çiqas ke cayê xo de yî zî nameyê înan lîsteyan de çin o.
DÎHABER/AMED