Agêrayîşê Êzidîyan dewam keno

Badê ke 3ê Tebaxa 2014î de çeteyanê DAÎŞî hêrişê Şengalî kerdbî, bi sehezaran êzidîyî mecbûr mendbî ke koç bikerî. Êzidîyê ke koç kerdbî, Başûr, Vakûr û Tirkîya de xeylê kampan de bica bîbî. Dima ra vera çeteyan de têkoşîn ame dayene û Şengal çeteyan ra ame pakkerdene. Pakbîyayîşê Şengalî ra dima ra nata agêrayîşê Êzidîyan dewam keno.

No hewte 7 keyeyê bînî agêrayî Şengal. Elyas Şengalîyo ke nizdîyê 5 serrî kampe de mend, wina va: “Kampe de ma ra ameyêne vatene ke Şengal biewle nîyo. Labelê wina nîyo. Ma nika vînenî ke Şengal yê verên ra biewleyêr a. Ma wazenî ke wa dewa ma de mektebêk bêro viraştene.”

Şengalijan ra Xwedêda Hecîyo ke kampa dewa Sîna ya Dihokî de mend, va ‘ma nêşêna şert û mercanê kampe de hîna zaf bimanî’ û wina dewam kerd: “Ewja de cuyayene zehmet bi. Ma mîyanê hewteyêk de 7 keyeyî agêrayî Werdî. Seba ke ma agêrayî erdê xo, ma kêfweş î. Se beno wa bibo, merdim herra xo ser o hîna bextewar o. Ez veng dana heme Êzidîyê ke dormeyê Şengalî de cuyenî, wa biagêrî erdanê xo. Seba Êzidîyan cayo tewr biewle Şengal o.”