Badê fermanê Erdogan’î Meclîs kewt hereket û vera parlamenteranê HDP operasyonê terorî yê hikûmet destpa kerd. Pêdiyayişê pêşnûmeyê wedarnayişê heqê destnêdayişî zî destpa kerdî. Verîya ke qerarê komîsyonî bivejyo xora AKP hikmê xo da yo. Munaqaşeyanê Meclîs û komîsyonî de parlamenteranê AKP nîyet û waştenanê xo bi vatişanê ‘terorîstî teber’, ‘ganî şima nika girotxane de bê’ aşkere kerdî.
Parlamentoyê Tirkîye ke ser înkarê şaran û îtiqatan ronîya, nika reyna vera îradeyê kurdan derbeyê faşîstîn virazeno. Partîyê rejîmî dûştê kurdan reyna îtifaq viraştî, cepheyê tirkperestî de bî jû. Tenya partîyê sîyasî nê, Erdogan’î winî kerd ke, çarçoveyê tirkperestî de şaran zî ard pêver, kerd lete. Tenya vera parlementeran nê, hikûmeta AKP zey qerarekê dewlet vera kurdan qerarê tesfîye giroto. Vera parlamenter, şaredar, îdarekarê HDP, DBP, vera pêrokîn kurdê ke wayrê rûmetê xo, erjê xo vejyenê qerarê çinîkerdiş giroto.Sebebê darbeya AKP hetê herkesî yeno zanayen. La ma fina bi çend nûmûneyan binê ci xê bikerê.
* HDP weçînayişan de dêsê weçînayişî ravêrna, 81 parlamenterî rişt Meclîs û îmze eşt bin serkewtişeke gird. Bi na serkewtişî planê serokîn yê Erdogan’î xeripyayî.
* Vernîya dîktatorî û konseptê herb yê Erdogan-AKP tenya HDP vindiya, Meclîsî de muxalefetê ci kerd û nê planan teşîr kerd.
* Wextê weçînayinan de tenya HDP kotayeke gird ceniyan rê abirna û bi serra çewres kota parlamenterê cenîyan rişt Meclîsî.HDP zerre û teberê Meclîsî de her firsetî de hayr ant serbestî û têdûştîya ceniyan ser, verra zihnîyetê AKP ke tecawuz, tacîz û şîdetî ferz keno tekoşîneke gird da.
* Tenya HDP problemê civakî, yê ekolojî, ekonomî, perwerde, cînayetê gurekaran ûsb. berd rojdemê Meclîsî û îxtidarî ra hesab pers kerd.
* Hesabê 34 gencanê Roboskî, Cemîle ya Cizîrij ke meyitê ci bi rojan dolabêcemedî de mend, Rozerîn’a Amedij ke bi aşman o ke meyitê ci werte de çinyo tenya HDP pers kerd. Hesabê bodrimanê wehşetî ke ganî bi ganî bi bi desan cenî, doman, gencî amey veşnayiş tenya HDP pers kerd. Parlamenteranê HDP tenya Meclîsî de siyaset nê ramitî. Herzewbîn xoverdayişê şarî het de ca girotî û vernîya faşîzmê hikûmetî de day xover.
Nîyet û planê AKP aşkere yo. Wazenê parlementerê ke bi îradeyê şarî weçîniyayî çekerê girotxane, şarî bê rayverîn veradê. Darbeyeke gird dewre de ya. Raşt o, tekoşînê şaran bi Meclîsî ra bi sînor nîya. Kurdî bêçare nîyê ûher ca de tekoşînê serbestî ramenê. La parlamenterê ke Meclîsî de yê temsîlê îradeyê şarî kenê. Veng, ziwan û rengê şarî yê. Wedarnayişê nestnêdayişan xespê heqî yo. Nayî ra ganî vernîya na darbe bêveng nîro mendiş. Ganî pêrokîn weçîntoxê HDP bi şîyara “Dest mede îradeyê mi” bivejyê meydanan û wayrê îradeyê xo bivejyê.