Sûka Almanya Frankfûrt de bi tewrbîyena seyan cenîyan rayşîyayiş û mitîngeke virazîya. Rayşîyayişa ke seat 15:00 de kuçeyê Kaîser de destpa kerd bi slogananê ‘Şîdeta cenîyan rê nê’, ‘Cenî ciwîyayiş azadî’ heta Meydanê Alte Oper dewam kerd. Nûmayiş de bi xo ser o dayişê çarşefanê sîya hayr ancîya bazarê kole yê DAIŞ ser. Herzewbîn zey şiklekê sembolîk veyvekinî day jû domana keynekî ser o û bi nayî hayr ancîya veyvikê bi emrê domanîye ser o.
Rayşîyayişî ra dima mitîngeke virazîya û mesajê ke amey dayen de şîdetê ser cenîyan û civakî rê nêrazîbîyayiş damûsnîya. Nûmayiş bi slogananê “Cenî Ciwîyayiş Azadî’ qedîya.
Ganî tekoşîn unîversal bo
Sûka Almanya Dusseldorf de zî bi organîzeyê CENÎ, Platformê cenîyê rî huwenok, ADKA û TJK-E Keyeyê Kultur ê Medya de paneleke virazîya. Panelîstan aşkere kerdî ke rîwalo ke şîdetê vera cenîyan unîversal o, ganî dûştê ci de tekoşîn zî unîversal bo. Qiseyan de hayr ancîya zihnîyeta wertex yê DAIŞ û AKP ser û vajîya ke cenîye Kurd tekoşînê cenîyan rê pêşengî kenê.
‘Cenî ciwîyayiş azadî’
Sûka Almanya Hîldesheîm de zî bi eynî waşten nûmayişeke virazîya. Şîdetî ra pîya qedexeyê Almanya yê ser PKK zî protesto bi. Kurdistanijê ke ver Îstasyonê Tren de are bî heta zerreyê sûk bi slogananê ‘Cenî ciwîyayiş azadî’, ‘Terorîst Erdogan’ ray şî.
Dortmûnd de zî Kurdistanijan bi nûmayişeke hayr antî şîdetê ser cenîyan û qedexeyê PKK ser. Nûmayiş de vera qirkerdişê Kurdan bêvengîya welatanê Awrûpa protesto bî.
Herzewbîn sûka Fransa Marsîlya, Paytext Parîs, sûka Hollanda Arnhem, Paytexta Fînlandiya Helsînkî û xêlê cayanê bînî de zî cenî vera şîdet û zihnîyetê serdest meydanan de bî. Pêrokîn nûmayişan de cenîyan him şîdetê camêrd û him zî yê dewletê ra vatî bes o. Herzewbîn cenîyan dûştê şîdet û qetilkerdişê cenîyan de mesajê berzkerdişê tekoşîn day.
NAVENDÊ XEBERAN