Wekîlê Serekîya Koma Partîya Demokratîk a Şaran (HDP)ê Îdrîs Baluken vat ke heremê ewle mojnena ke AKP dest pê operasyonê îmhayî kerda, nika Kurdistan de konsepta şer a AKPê yena şuxulnayiş, çarçiweya na konseptê nika dewîy yenî veşnayiş, kuçeyan de bê darazîyê merdim yenî kiştiş, dewîy hewna yenî vilakerdiş, polîsê AKPê çalakîyê welatijan ra seba kiştişî hêriş kenî, heme nê operasyonê lêmin şarê kurd serrê 90’î ra zanenî, çimkî nê serran de zî şarê kurd ser eynî konsepta şer ameynê şuxulnayişî.
Şuxulnayîşê OHALî
Baluken dîyar kerd ke çi heyf ke AKP nika ravêreyeya aştîyê wedarnaya rafê, zatî no nêzdîbîyîşê AKP zî mojnena ke AKP do konsepta xo ya şerî hîna herayêr bikera û wina vat: “Kurdistan de taybetî şaristanê Colemêrg, Şirnex, Dêrsim, Qers û şaristanê bîn de AKP heremê ewle îlan kerda, ma tersenî ke peynîya nê heremê ewleyê operasyonê îmhayî dest pê bikerî. Ma aşkera vanî ke serrê 90’î de zî nê polîtîkayê lêmin ameybî şuxulnayiş, AKP zî zanena ke bi na konseptî çareserî nîna, labelê nê operasyonê mojnanî ke Erdogan merdimo ke çiqas bi teluke yo. Ma bi rehetî eşkenî bivajî ke nika Kurdistan de rewşa OHALî yena şuxulnayişî û na şuxulnayişê OHALî heme zûrê AKPî aşkera kerd çimkî AKP her tim vatê guya ê OHALî wedarnayî. Ganîyo ke AKP bi lezî na konseptî xo ra fek verado û çareserîyê zî do masaya muzakerîyê de bigêro.”
Dîyalogî red kerd
Baluk destnîşan kerd ke AKP her tim vengê înan a dîyalogê red kerda û wina dewam kerd: “Seba problemê rojdemî ma çend ray heyeta dewletî reyde pêvînayiş viraşt, teberê ci ma hetanê nika nê hukimatê reyde nê zî dewletê reyde pêvînayiş nêkerdî.
Ma bawerî ke peynîya heme nê polîtîkayan polîtîkayê lêmin ê AKP estî. Tirkîya de sifteyin dijî konsepta şerî îtîrazeko gird esta. AKP êdî zey serrê 90’î nêeşkena damarê nijadperestîyê verba şarê kurd bişuxulna. Êdî pêroyina şarî de êdî waştişê aştîyê esta. Lejkerî ke cuyayişê xo dayî taybetî dorûverê feqîr, kedkar û karkerî ray ê la ma ewnîyenî qet domanê sîyasetmedaran cepheyî de ca nêgenî, hetta bi raporo helisîyayî de remenî, ez bawer kena ke do AKP nêşkeno nêy polîtîkayan wina bidomno.”
ALÎ BARIŞ KURT