AKP ya ke kamîye ke “Tirk” û “Sûnnî” nîyê înkar kena hewl dana kamîye ke bîatê ci bikerê rono. Vejya teber ke AKP ya ke qenala elewîyan TV 10 girewt nika hadreyînê qenaleke hetkara xo yê elewîyan kena. Endamê Desteyê Îdareyê TV 10î Velî Buyukşahînî aşkere kerd ke pey qenala newî de Yardimkarê Serokê Karê Şarî yê AKP Yalçin Ozdemîr esto.
Goreyê zanayişanê Buyukşahînî qenala ke behsê ci yeno kerdiş nika merheleyê testî de ya. Velî Buyukşahînî da zonayiş ke beno ke pey no projeyî de tayî rêxistinê alewî yê ke nezdîye AKP yê zî bibê û vist vîrî ke bi na hemle wazenê alewîyan asîmîle bikerê.
Kes îtibar nîkeno
Buyukşahînî ard ziwan ke hikûmeta ke qenalê ke elewîyan temsîl kenê girewt, seba ke elewîyan entegreyê polîtîkayanê xo bikero televîzyonanê newî akena û wina dewam kerd: “Eke hewcedarîye hometa elewî bi televîzyonêke esto se, ti çima televîzyonê ke estê gênê. TV 10 bi loqmeyê elewîyan abîya. Televîzyono ke elewî riza nêdanê kes îtibarê ci nîkeno.”
Velî Buyukşahînî dîyar kerd ke wazenê elewîyan bi polîtîkayê ‘bitersne û dûrbivisn’ quwetanê demokrasî ra abirnê û va, “Hedefê esasî no yo ke hometa elewî bi qetlîaman bitersnê, bidê îtaatkerdiş, peyser gam bidê eştiş. Nayî ra cemxaneyan kenê mor, ser medyaya sosyalî ra tehdîd kenê.”
Hometa elewî do xover bido
Endamê Desteyê Îdareyê TV 10î Velî Buyukşahînî da zonayen ke hometa elewî do vera nê tehdîdan de teslîm nêbo û qiseyanê xo bi nê vatişan qedêna: “Senî ke dewrê Osmanîyan de seba ke elewîyan qir bikerê hêriş kerdî se, ewro zî îxtidara AKP zî eynî çiyî kena, hewl dana ke îtiqatê qizilbaşî werte ra wedarno. La nê hewldayenî tolê (veng). Çike Huseyîn o ke Kerbela de bi 72 kesan ra pîya xover da esto, Pîr Sûltan esto, Koçgîrî esto, Dersim esto. Nayî ra hometa elewî do teslîm nêbo, bi demokrat, şoreşger û welatperweranê no welatî ra pîya xover bido.
ZEYNEP KURAY / ANF / STENBOL