Pisporê Yewîya Ewropa (YE) û Ilmnasê Sîyasetî Prof.Dr. Cengîz Aktarî derheqê referandûm û problemo ke mabênê Hollanda û Tirkîya de yeno cuyayîş de qisey kerd.
Aktarî va ‘hukmat no demêko derg o ke rayîrê xo Rojawanî ra qerfnayîşî gêreno’ û wina domna: “Têkilîyê ke YE, Konseyê Ewropa û AGÎTî reyde yenî ronayîş de demêko derg o ke dişmenîyêk esto. Wina aseno ke no do hîna dewam bikero. Nika ra pey wina aseno ke tena NATO reyde têkilîya ci mendo.”
Teber de kampanya
Aktarî reaksîyon nîşanê vatişê ‘Nazî’ û ‘faşîst’ yê Erdogan û wezîrê AKPyî da û wina va: “Wezîran bin nameyê ‘agahî dayîşê referandûmî’ de şîyî labelê ewja de hewl dayî kombîyayîşê ‘ya’ bivirazî. Vatişê Nazî û faşîstî yeno manaya heqaretkerdişê qurbanê Nazîyan. No çîyo ke rehet nîyo. Cihuyî, çîngeneyî, romanî, sosyalîstî û sewbîna zaf hetî Nazîzm ra zirar dîyî. Ti cayê dinya de seba welatîyanê teberê welatî mîtîng nîno viraştiş. Mesele Fransa de weçînayîş bibo, namzedê Fransa sewbîna welatan de kampanyaya weçînayîşî nêvirazenî. Çîyo ke winasî çin o. Nê heme seba zêdekerdişê reyanê ya yenî kerdiş.“
Rewşêka şîzofrenîk
Aktarî peynîya qiseykerdişê xo de va ‘merdim nêeşkeno vajo mabênê Ewropa û Tirkîya de peymanêk esta’ û wina qedêna: “Mabênê çîyê ke Tirkîya de benî û rewşa ke wezîrê AKPyî Ewropa de rî bi rî mendî, sey yewbînan o. Labelê tîya de rewşêka şîzofrenîke esta. AKP çîyo ke nêwazeno bêro sereyê ci, Tirkîya ser de keno. Cok ra merdim bawer nêkeno. Qala azadîya fikrî yena kerdiş, azadîya fikrê ya kamî? Bawerîya merdimî nê vatişanê AKPyî rê nîna. Labelê weçînitoxê AKPyî bawerîya xo pê anî. Tirkîya wazena xo YE ra biqerfna.”
DÎHABER/STENBOL