Grûbêka keyeyan bi îdîaya domananê înan erşawitî koyan, 3ê Êlule ra nata vernîya awanîya HDPyî ya Amedî de ronîşenî. Dima ra keyeyê leşker û polîsê ke hetê HPGyî ra ameyî esîrgirewtene zî beşdarê nê keyeyan bîyî.
Hemserekê HDPyî yê Amedî Zeyyat Ceylan derheqê vindetişê keyeyan de qisey kerd û melumatê muhîmî dayî. Ceylanî dîyar kerd ke dewlete bi hawayo dirî nizdîyê keyeyanê ke vejîyenî ziqaqan bena û wina va: “Dayîkê ke vernîya awanîya AKPyî ya Amedî de roniştî, bi zorî wesayîtan reyde ewja ra ameyî durîkerdene. Dayîkê ke vernîya HDPyî de ronişenî domananê xo wazenî, labelê dayîkê ke vernîya AKPyî de ronişenî zî eynî çî wazenî. AKP dirîtîye kena.”
Ceylanî dewamê qiseykerdişê xo de va ‘bi hawayo zanaye, çarçewaya senaryoyêk de hîs û dejê dayîkan yenî îstîsmarkerdene’ û wina dewam kerd: “Amancê înan krîmînalîzekerdişê HDPyî yo. Ê seba ke HDP padî çîyanê winasîyan kenî, labelê nê senaryoyî nêtepişenî. Tayê keyeyî kam î, ma nas nêkenî. Înan nê keyeyî ardî tîya de dayî roniştene. Dîyar beno ke tayê keyeyî verê ra ameyî îknakerdene. Wazenî tîya de provokasyon vejî. Ma vindetişê keyeyan ra eciz nêbenî, labelê îqtîdar hîs û dejê keyeyan ra feyde vîneno û ma nêyî ra eciz benî. Medyaya hetgire zî hewl dana HDP sucdar bikero û krîmînalîze bikero. Heto bîn de yeno vatene 35 keyeyî estî, labelê raşt wina nîya. Tayê keyeyî ewnîyayî ke netîce nêgênî, şîyî.”
n MA / AMED