Şaro kurd vîna welato şîrîn, şehrê şarezayê û şaro qedîm bîyo hedefî tîrkewana îlhaqkeran, vîna îradeyê şaran newe ra bîyo hedef û vîna bi aweyeko modern yew deko newe despekerdo. Vîna, reyna na zerra hemdêm bena lete-lete.
Vîna newe ra bi awayêko modern warê hezaran şehîdanê azadî newe ra dek bena.Vîna, tam demokratîk perspektîfî sereko hemdem bena xelasîya Rojhelatê Mîyanên, huto tekperest vejîya meydan û vîna reyna îrade şarê welato zalîm bîyo hedefî deshelatdaro fekgunîn. Şaro kurd no weçînaye de vat, beso! Şaro kurd narey pe sîlaho modern, pe rayê xo, şi sere sandoqan de xover da. Firq nêkeno eynî sey cengewaro Rûstem Zal xover da…
No weçînayê pêroyî de şaro kurd partîya şaran, partîya xo HDP wayer vejîya. Vîna, hezo hikumran, HDPyan yew rexistina şarê Tirkîya nêvîneno. No qiweto otorîker sankî HDP êtîmî pe koyo efsûn, êtîmî pê Koye Qaf ra ameyê Tirkîya de zorakî bica bîyê, xo rê yew partîya terorê awa kerda, he sîyaset kenê.
Sankî, HDP yew tranfer partîya, xo zorakî ferz kena. Sankî Efriqa ra kesê şarezanebîyayê ameyê, bîyê hewr qesra Beştepe kenê tarî û sero de nanxurî kenê. Sankî ganîmet dim koyanê Ural-Altay ra yew şaro îlhagker û talanker ameyo kedê kesê şarazeyî (tirko sipî û kurdo sipî) wenê, nanxurî kenê.
Sankî Asya nezdî û Asya dûrî ra hecuc-mecuc ameyê xozayê Kurdistan û Anatolîya wenê. Sankî Amerîka û Ewropa ra çerçîyê teşan û hutîfekgûnînî merdimahî ameyê awe Firat û Sakarya şimenê. Malesef îradeyo deshelatdar bi no feraset nezdî partîya şaran, Partîya Demokrasî ya Şaran (HDP) bi, şarê Tirkîya deshilatdarî ra vat, êdî hedî xo bizanê. Hedî kesî nîyo, partîya şaran bê îtîbar bikêro. Hedî kesî nîyo partîya şaran pe bende weçîn îtham bikêro, vat.
No weçînayê pêroyî de şaro kurd ders da nêyaran xo, ders alerjîkeran xo. HDP herî zaf hedefî serekî Komara Tirkîya Erdogan de bî, zedê no weçînayê de ders da ey. Serekomar Erdogan her xebate xo de ‘Partîya HDP bê dîn a. Sîyasî hereketa kurd zerdûşt a. Nêy perwerdeyê zerdûştî vînenî.’ Şaro kurd şi sere sandoqan veng da ne heqaretan. La sankî AKP û Erdogan no weçînayo pêroyî vînî nêkerdî. Malesef îslah nêbenî. Alerjîya kurd heyf ke xo dana vatiş.
Ma bi ewnî Serekomar Erdogan bade weçînaye ra vano se? “Bi ewnê, kerem bikêren, heza rojawan Tel-Abyad de pe teyaran dana tirkmenan û ereban ro. Uta de partîya teror PYD û PKK bica kenî. Ma heza bati û no bîyanê dirust nêvînenî.” No vatenan de fam beno, AKPyî tena rijnayişî gûnîya kurd, xespkerdişî heq û herdî şaro kurd, xespkerdişî xo bi xo îdarekerdişî şaro kurd wazenê. Ne vatenan de fam beno AKP û rayberî ey pawe dersa diyînê yê…!