BERÎTAN WAN / ANF /BEHDÎNAN
Hukmatê AKPyî 24ê Temmuza 2015î de vera Warê Pawitişî yê Medya de hêrişê hewayinî dabî destpêkerdiş û bi no hawa prosesê aştî ke hetê Rayberê Şarê Kurdî Abdullah Ocalanî ra 2013 de dîyabî destpêkerdiş, xira kerd û Tirkîya kirant mîyanê şerêko gird. Endama Konseyê Leşkerî yê YJA Starî Peyman Bagoke derheqê nê prosesî de û çalakîyê gerîlayan de qisey kerde û vînayîşê xo arde ziwan. Bagoke va ‘vera gêrayîşê Rayberê Şarê Kurdî Abdullah Ocalanî yê aştî de AKP tim bi hawayo nêsamîmî hereket kerd’ û wina dewam kerd: “24ê Temmuze ra dima êdî çi şar û çi zî gerîla bawerîya xo AKPyî rê nêard. Cok ra gerîla bi vindetişê xo yo fedaî û şar zî israrê xo yo xoserîye de nîşan da ke çiqas qerardar î. Vera nê xoverdayîşê ke her serre zêde benî de AKP êdî têk şîyo û peynîya ci nizdî yo.”
Çareserî çin a
Bagoke dewamê qiseykerdişê xo de va ‘her çiqas ke Rayber Apoyî 2013 de prosesêk daybî destpêkerdiş û masa zî ameybî ronayîş, reyna zî yê ke waştêne nê prosesî sabote bikerî zaf bîy’ û wina dewam kerde: “Rayber Apo nêyî sey ‘dewleta xorî’ îlan kerd. Reyna o wext hêrişê ke bîyêne û viraştişê qerekol-kalekol û sewbîna zî nîşan dayênê ke seba çareserîya problemî ti plan û projeyê hukmatî çin o. Xora hêrişê ke 24ê Temmuze de dest pêkerdî zî nîşan dayî ke nîyetê AKPyî seba çareserî çin o. Amadekarîya şerî nêvindarnayî; tim qoricîyî ameyî girewtiş, seba ke têkilîya şar û gerîla biqerfnîy heme çî kerdî. Hêrişê Kobanê, Şengal û sewbîna nîşaneyê nê yî. AKP û DAIŞ sey yewbînan î. Konseptê AKPyî de rolê PDKyî zî estbî.”
Taktîkê dewlemendî
Bagoke qiseykerdişê xo de bale ante xoverdayîşê bajaranê Kurdistanî û wina va: “Erdogan paweyê şerêko winasî nêbî. Hukmat şerê bajaran de têk şî; çimkî piştîdayîşê şarî estbî. Xoverdayîşê ke rayberîya ci Çîyager, Zeryane, Xebatkar û sewbîna kesan de aver şî, hêzê tewr girdî yê artêşe têk şîyî. Artêşe Nisêbîn de sendromêk cuyaye. Şarê ma cêrzemînan de ame qetilkerdiş. No zî şar de hîna zaf hêrs û nefret viraşt. Çîyagerêk şî, bi hezaran Çîyagerî ameyî, Zeryane şîye, bi hezaran Zeryanî ameyî. Her kes dîyêne ke hukmat têk şono. No proses de vera hêrişê hewayin yê artêşe de taktîkê dewlemendî yê gerîla aver şîy. Gerîla de ruhêko fedayî vejîya aver. Embaz Zinarîne û Doga nefretê ciwananê kurdan nîşan dayî. Edî kurdî vera AKPyî de çi bêveng mendêne û çi zî bawerîya xo bi AKPyî ardêne.”
AKP bi xo têk şî
Bagoke qiseykerdişê xo de qala vatişanê AKPyî yê têkberdişê PKKyî kerde û wina va: “AKPyî emser zaf qala têkberdişê PKKyî kerd, labelê o bi xo têk şî. Hedefê AKPyî qedênayîşê PKKyî bî. AKP vînî kerd. AKP 24ê Temmuze de xo bi xo prosesê qedîyayîşê xo da destpêkerdiş. Ma gerîlayî do textê Erdoganî bileqnî. Sozê ma esto ke ma demêko kilm de AKPyî îqtîdar ra bîyarî war. Çimkî hetê ma de dîyar bîyo ke bi AKP nêbeno. Labelê do tarzêko senîn bêro, ganî Tirkîya qerarê ci bido. Nê koyî yê ma yî, Kurdistan yê ma yo. Yê ke hakim o ma yî. Nêşênî bi şerkerdiş biresî cayêk. Eke şer dewam bikero, krîzê ekonomîk û mergê zafî paweyê Tirkîya bîy. Labelê eke merganê domananê xo muhakeme bikerî û netîceyêk bigîrî, o wext do Tirkîyayêka demokratîke beno ke bivejîya orte.”