AKP bêparalel nêşîkîna payra vindero. 10 serrî ra jede bi paralelê xo Cemaatê Fetullah Gulen ra piya gureye. Par asma gaxane de AKP û Cemaatê Gulen kewtî tê. Nika mavênê hurdemîne de herb esto. Henî oseno ke hurdemena naye ra tepiya endî têlewe nînê.

AKP derheqê kerdîsanê Cemaatê Fetullah Gulen de pêro pêhesnayîşî estî peyê gosê xo. AKP pêro zulmê polîs û savciyanê paralelê xorê wayîr vejiye. Polîşî qehraman bî, savci qehreman bî, eskerî qehreman bî.
Nînan o dem verva kurdan û rêxistinanê çepizan her zulm ardenê kar. La, 17 asma gaxane layê mavênê AKP û Cemaatê Fetullahî vişiya. Hama hen oseno ke AKP na biyayîs ra hona derse nêgureta.
AKP nika xorê onca paralelan kena pêda. Kurdîstan de xorê HUDA-PAR jê paralel çînîta we. Na Hîzbul-Kontra xêle serrî Kurdîstan û Tirkiye de teror vay da. Peyniye de dewleta tirkî rayverê Hîzbul-Kontra kiştî. La hukumatê AKP azayê na rêxistina qetilkare hepisxanan ra serbest verdayî ra. Hîzbul-Kontra hesavê kerdîsanê xo nêda, teyna namê xo vurna kerd HUDA-PAR. Nika zî Kurdîstan de AKP rê xizmete kena. Erzena welatparêzan ser kisena, kena dirvetin.
Rêxistina Hîzbul-Kontra HUDA-PAR par Batman de xorto welatparêz Ozcan Temel qetil kerd. Na dawa hona ramena. La savciyê dewleta AKP onca metodanê virenan anê kar û wazenê na biyayîs zelal nêbo. Mehkemê AKP wazeno dawa Ozcan Temel jû suka bîne de bêro vînitene. Yanî wajîno ke na dawa biruşniyo sukanê rojavayê Tirkiya û qetilkarî bêre pakkerdene.
Emser zî onca garana HUDA-PAR Lîce de est sarê ma ser. Dima hetê Mêrdîn de gonî virte ra. Gonewerê HUDA-PARiz na raye zî hefto peyen Bîsmîl de vejayî meydan. Bi seveknayîsê polîsê AKP sarê ma bi çekan tehdît kerd. Polîsê AKP onca tewa nêkerd, nî kurdê faşîstî seveknayî.
Yemê Tirkiye de zî AKP onca xorê jû paralelo bîn kerdo pêda. Nî zî nijadperest û faşîstê tirkî yê. Îzmîr Urla de serestîsan verva HDP asma gucige de dest kerd ci. Dima Estemol Kadikoy de devam kerd. Teqetê dewlet û hukumatê AKP nî cayan de zî paralelê xo seveknayî.
Onca hefto peyen garana faşîst û nijadperestan Aksaray de est HDPyîzan ser. Naca zî quwetanê tîvariya AKP, polîs û eskeran, nî faşîst û nijadperestan rê yardim kerd, seveknayî.
Kurdîstan de HUDA-PAR, yemê Tirkiye de garanê faşîst û nijadpersetan paralelê neweyî yê AKP yê. Hama, Recep Tayyîp Erdogan guna jûye bizone: Dizdiye û risfet belka o nêqedena, hama halnêkerdena mesela kurdî û verva kurdan kar ardena paralelan ey qedenenê. Mesela kurdî hata nika sarê xêle serokwezîranê tirkî werd.