Gorê raporê ÎHDe mîyanê dîrokê 21 temmuz û 28 tebaxe de 92 lejker, polîs û 38 gerîla zî cuyayîşê xo vinî kerdî. Hewna rapor de yeno vatiş ke zey demê 90’î sivîlî raşteyan de yenî qetilkerdiş û 47 sivîl amey qetilkerdiş û 2386 kesî zî bi operasyonê sîyasî de amey binçimgirewtiş.
Rewşeko xirap
Çi heyf ke peynîya weçînayîşî dewlet xo bi xo ravêreyeya çareserî xirap kerd, nika dewlet sivîlan qetil kena. Nê terteleyî zî vîrê merdimê serrê 90’î anena, çi heyf ke nika serrê 90’î ra hîna xirap yew tablo esto. Guya AKP vatî dewlet kurdan ra zilm kena labelê nika AKP vatişê xo vila vet û dewlete ra hîna xirap zilmê şarê kurd kena. Nika Kurdistan de AKP bêfermî rewşo îstîsnayî şuxulnena.
Kurdan qebul nêkenî
Dewleta tirk bi bombevarnayîşê Kurdistanî aşkera vana ke noca welatê min nîyo, şarê kurd zî sewbî welatî de cuyenî. Çimkî qet yew dewlet axê xo ra bombe nêvarnena. Çi heyf ke dewlet Kurdistan de sivîlan qetil kena. Nika Kurdistan de operasyonê sîyasî zî domyenî, mîyanê di aşmî bi hezaran kesî ame girewtişî eke ona dewam bikero do bi hezaran kesî hîna bêrê girewtişî, no ser zî ganî aştîye rê Mutabakatê Dolmabaxçeye bêro şuxulnayîşî û Rayverê Şarê Kurd Abdullah Ocalan zî azad bibo.
Gorê xeberê Rojnameya Birgunî Stenbol de Mîyandibistanê Îmamî ya Tacîrler Egîtîm Waqfî de vejîya meydan ke dibistanan ra talîmatê AKPe reyde perwerdeya lejkerî ‘Perwerdeya şehîdbîyîşî’ yena dayişî. Taybetê wendekarekê emrî înan mîyanê 10 û 15’an de yo, nê wendekaran ra no perwerde yena dayişî. Baxçeya dibistanî de wendekaran çekê temsîlî reyde perwerde gênî û wendekaran çek û zey lejkeran raşt û çep reyde meşîyenî. No polîtîkayo newe yo AKPe ra welatijan bertek mojnayî.
AKPe talîmat dayo
Babete ser mudirê dibistanê Dogan Hakli ciresanayo ke na perwerde çarçiweya Heskerdişê Netew û Welatî de ameya viraştiş û wina vat: “Na perwerdeye ma nêdanî, Navenda Perwerdeya Şarî organîze kena û Mudirîya Perwerdeya Netewe zî tesdîq kerda.”
NAVENDA XEBERAN