Faşîzmê dewletî wextê weçînayîşan ra heta nika bêmîyan domyeno. Verê weçînayîşan de wexto ke AKP anketî viraşt û dîy ke HDP bendawî vîyarneno aye wext hemverê HDPe topyekun hêriş daybî destpêkerdiş.
Ewil Edene û Mersîn de bi teqnayîşê bombeyan waşt peyam bido HDPe. Dima zî Erzirom, Bêdlîs, Agirî, Çewlîg peynî de zî Amedî de bi teqnayîşê bombeyan waşt hem çimê HDPe bitersno û hem zî wina bido mojnayîş ke asayîşê weçînayîş çin o. Hetê heme hêrişan de şarê kurd bi awayo polîtîk têgêra û destur nêda ke îqtîdar çîyo ke wazeno dest biko. Wexto ke HDP weçînayîşan de seyî ra 13 ray grewt ra dima serekkomar bi rojan qesra xo ra nêvejya û dima wexto ke vecya zî dîyar bike Erdogan netîceyêy weçînayîşan ra qayîl nîyo û no rewş zatî qalîkerdişê ci ra zî dîyar bînê.
Goreyê netîceyê weçînayîşê 7’ê hezîrane HDP yew serkewtişek gird dest kerdbî û verê xeyalêy Erdogan û AKPe ra kerra ronabî.
Bi no hawa çi Erdogan şîna bibo serek û çi zî AKP bi tena sereyê xo bibo îqtîdar. Wexto ke no raştî ame famkerdiş ra dima hem Erdogan û hem zî mêrdimê ci no raştî qebul nêkerdîy û bi awayo korsan dest rona îqtîdarî sero û hezey ke êy ke weçînayîşan de têk şîy êy nêbîy wina têgêray.
Şar rayê xo da HDPe
Heta ra ray no raştî bi şaşî (!) fekê xo ra zî remnay û vatîy: ‘Şar rayê xo dayo HDPe, la çarekerdişî ma ra vindeno.’ Dima zî Erdogan vatênê ke ravêreyeya çarekerdişî mîyanê dolaba qeşayî de ya. Eslê xo de no vatişî û pratîka ci nişan dano ke Erdogan nêy netîceyê weçînayîşan qet qebul nêkerdo û şewa 7’ê hezîrane ra ya ke sereyê xo de no weçînayîşê qet nêhesibneno û hezey ke no weçînayîş qet nêbîyo têgêreno.
Aye çax ra heta nika sereyê ci de dibarekerdişê weçînayîşî esto. Semeda ke sereyê ci de no fikir estbi heta nika awankerdişê koalîsyonî de her tim sera sera têgêra. Xo sey her tim mexdur nîşan da ke hezey ke o wazeno îqtîdar awan bibo la partîyêy muxalefetî nêwazenî awan bibo.
Ger ke merdim weçînayîşê 7’ê hezîrane ra heta nika vindertiş û vatişanê ci ra biewnîyo fam keno ke Erdogan no netîceyî qet qebul nêkerdo.
Rayna Erdogan û partîya ci hezey ke weçînayîş qet nêbo û hezey ke îqtîdar destê xo ra vindî nêkerdbi, wina têgêrenîy. Ger ke ma awayo bîn bivacî yanî AKP bi darbeyo sîvîl îqtîdar destê xo de tepîşt. No tepîştiş de rol û mîsyonê partîyêy muxulîf zî esto; semeda ke hemverê no rewşî lazim bi ke qîyamet biqerfnaynê. La no hetî de bêvengîyek serwer bi. Erdogan û îqtîdara AKPe zî no bêvengî ra hêz girewt û hîna zafer ser şarî de şî.
Erdogan û îqtîdara AKPe bi qebulnêkerdişê encamêy weçînayîşan dekewtîy mîyanê têgêrayîşî û waştîy ke heyfa têkşîyîşî şarî ra bigîrîy. Ewnîyay ke nêşkenîy şarê kurd bixapenîy çim eştîy rayanê MHPe û semeda ke hetê MHPijan ra rayan bigirî dest pê hêrişan kerdîy. Bi teqnayîşa bombeyê Pirsûsî zî parçeyek no polîtîkayî bî. Tîya de çend armancê înan ya bîn estbo zî armanca bingeyînan ra yew zî no bi. Semeda nêy rayan hemverê şarê kurd û demokratan dest pê hêrişan kerd. Bi erêkerdişê ABD û KDPe zî hemverê PKKe hêrişo tewr gird da destpêkerdiş. No hêriş mîyanê 30 serran ke dewleta tirk PKK rey şer keno de hêrişo tewr gird bi. Bi desan teyareyêy şerî no hêrişî çend roj dom kerdî û hîna zî dom kenî.
Hemverê nêy polîtîkayanê îqtîdarî şarê kurd bi awayo asayî êdî maben dekerd mîyanê xo û dewletî. Semeda ke dewlet bîyayîşê şarê kurd qebul nêkerdênê û hem canê ci, hem malê ci û hem zî xozaya ci nas nêkerdênê, hemînan qir kerdênê. Ger ke eyro merdim gerdunî ra biewnîyo heme ganîyan de xopawitiş esto û şarê kurd zî sey heme ganîyan hêzo ke wazeno ci werte ra hawano ver dekewt mîyanê pawitişê xo.
Nêy, semeda ke şar Erdogan nêkerdo serek qewimyenî
Xora wexto ke AKP dîy ke şarê kurd sereyê xo înan vero çewt nêkeno Erdogan û AKP hîna zafêr har bîy û hêrişêy şarê kurd kerdî. Bi taybetî no çend rojêy peynî de çeteyêy AKPe kurdan bi awayo akerde hedef gênî û encamê no hedefgirewtişî de bi desan kesî cuyeyê xo vinî kerdî. Eslê xo de AKP û Erdogan bi no konsept wazena hem çimê kurdan û şarî bitersna û hem zî herema Kurdistan de bi îlankerdişê rewşa OHALî vengêy ke bi awayo asayî nêşîna bigîro bi awayo zorî bigiyo. Rayna sedema nêy hêrişan vatişê wezîrê ci Muezzînoglu ke aşkera vatênê zî yeno famkerdiş semeda ke şar Erdogan nêkerdo serek qewimyenî. Tîya de yeno amkerdiş ke îqtîdar wazeno şarî ra -bi taybet zî şarê kurd ra- vano: ‘Ya şima vengê xo danî ma, yan zî canê xo danî.’ Hemverê şarî Erdogan û îqtîdara AKPe heme îmkan dano xebetnayîş; hêzê lejkerî ra bigî hetanî çapemenî, rayna karmendan ra bigî heta melayan, muxtaran û casûsan xebetneno.
Polîtîkayanê 90’î
Raştîya xo de AKP dekewt mîyanê hesabê serranê 90’î. Eslê xo de eyro rêbazêy ke hemverê şarê kurd û kesêy demokratan sero xebetneno fatîha ser polîtîkayanê serranê 90’î de waneno. Na semed ra eyro tayîn kes vecyenî vanî gelo ma serranê 90’î ra tepa agêrenî, kerdişê AKPe bi temamî nêano ziwan. Çimkî eyro çîyo ke qewimyeno bi awayo dîyîşî de beno ke sey serranê 90’î bimano la awayo mîyanên serranê 90’î ra xirabêr o.
‘To ra pîlêr Homa est o’
Vano qey ke do bi xebetnayîşê heme îmkananê dewlete do serbikewo. La çîyo ke AKP xo vîra kena, dîrok ra heta nika baş ameyo famkerdiş ke ti hêz hêzê şarî ra girdêr nîyo û ti çek hemverê şarî nêşkeno serbikewo. Rayna ameyo famkerdiş ke ti kes an zî ti hêz hemverê şarî ser nêkewto. Erdogan xo herinda padîşayan de vîneno.
La vatişek a şarî esto ke padîşayî ra vano: ‘Xo vêşî gird meveyn padîşayê min, to ra pîlêr Homa esto.’ Eyro zî merdim eşkeno bivaco: ‘To ra pîlêr şar esto.’ Xora AKP her ke şono gonî vînî keno û çend ke gonî vînî keno hende hêrs beno û çend hêrs beno rayna hende hêriş keno û çimê şarî de raştîya ci hîna zafêr vecêno. Ger ke wina verdewam bikero do AKP mîyanê gonîya ke rijneno de do bixeniqyo.