Weçînayîşê 31ê Adare de Şaredarîya Bidlîsî hetê AKPyî ra ame qezençkerdene. Serekê Şaredarîya Bidlîsî Nesrullah Tanglayî sey karo sifteyîn verê xo da tabelaya Kurdkî ya şaredarîye û bi mehneya bena sîmgeya sîyasî, tabela arde war, herinda ci de tena tabelaya bi Tirkî aliqnaye.
Ame musayene ke herçiqas endamanê Meclîsê Şaredarîya Bidlîsî yê HDPyî vera na rewşe de îtîraz kerdo zî, talîmatê bedilnayîşê tabela ameyo dayene. Tabelaya şaredarîye, wextê qayûmî de daxî nêamebî bedilnayene, labelê hetê Tanglayî ra ame bedilnayene. Vera na rewşe de reaksîyonî her ke şono zêde benî.
Parlamenterê donemê 23. yê BDPyî Nezîr Karabaşî medyaya sosyale ser o reaksîyon nîşan da. Karabaşî mesajê xo de vato ‘Serekê Şaredarîya Bidlîsî Nesrullah Tanglayî seba tabelaya ke ser o Şaredarîya Bidlîsî nuştêne, vato sîmgeya sîyasî ya’ û wina dewam kerdo: “Kesêk nêyî vano tirko ke Edîrne yan zî Yozgat ra nêameyo. O zî sey mi dewe ra ameyo û zafaneyê endamê keyeyê ci Tirkî zî nêzanî. Ey bidlîsijî, gelo haya şima esta ke tabelaya Kurdkî ya şaredarîya şima dîyaya waro? Gelo dîyayîşê warî yê tabelaya şima ser o vatişêkê şima çin a? Eke bêro perskerdene, gelo şima do çi cewab bidî?”
Namzedê Hemserekîya Şaredarîya HDPyî Faruk Îşlekî zî reaksîyon nîşan da. Îşlekî mesajê xo de wina vato: “Ma bawer kenî ke şarê ma do vera naye de cewab bido. Xora ma kesanê ke bi kiriştişê reyan şaredarîye qezenç kerde ra çîyêk nêpawenî.”
MA / BIDLÎS