Çend rojî verê Serekkomar Erdoganî muşahîdanê AKPyî reyde kombîyayîşêk ke çapemenîye rê padaye bi, viraştbi û dima ra dîmenê ê kombîyayîşî medyaya komelkî de amebi weşênayîş. Dîmenan de Erdogan hetgiranê xo ra vatêne ‘seba ke HDP binê bendê weçînayîşî de bimano, çi destê şima ra yeno bikerê’.
Netîceyê nê vatişî hetê tayînan ra erzîya dewre. Qezaya Pirsusî ya Riha de AKPyijî hêrişê esnafî kerdî û netîceyê hêrişî de pêro pîya 4 kesî merdî û 8 kesî zî birîndar bîyî. Ame musayîş ke namzedê AKPyî Îbrahîm Halîl Yildiz û kesê ke dormeyê ci de estî, 2 rojî verê şonî esnafan ra rayan wazenî. Esnafî reaksîyon nîşanê Yildiz û dormeyê ci danî.
Roja bîne Yildiz na rey bi desan merdimanê xo şono dikanê eynî esnafan. Esnafan ra Haci Esvet Şenyaşar înan ra vano ‘raya ke ma bidî şima, çin a’ û dima ra Yildiz û pawitoxê ci hêrişê esnafan kenî. Netîceyê hêrişî de Şenyaşar yeno derbkerdiş û lajê Şenyaşarî Celal Şenyaşar bi hawayo giran birîndar beno. Wexto ke Şenyaşar şono nêweşxane hetê merdimanê Yildizî ra yeno lînckerdiş û lajê ci yo birîndar zî nêweşxane de yeno qetilkerdiş. Heto bîn ra birayê Yildizî Mehmet Alî Yildiz û yew pawitoxê ci zî merdî. Hedîse ra dima ame dîyayîş ke nêweşxane de kamerayê ke dormeyî vînenî, ameyî şiknayîş.
Ganî herkes hesas hereket bikero
Hedîse ra dima HDPyî Pirsus de seba 2 rojan şîn îlan kerd û do 2 rojan qeza de xebatê weçînayîşî nêkero. Babete ser o HDPyî bale anto provokasyonan ser û wina vato: “No hedîse ke netîceyê ci de 4 kesî merdî û 8 kesî birîndar bîyî, zaf muhîm o. Wa Homa rehma xo merdeyan rê bikero û ma keyeyê înan rê serweşî wazenî. Reyna ma birîndaran rê şîfa wazenî. Ma veng danî şarê Pirsûsî û rayapêroyîya demokratîke ke wa hesas hereket bikerî. Wa hukmat û medya fek girdkerdişê hedîseyî ra verabido. Ganî xebatê weçînayîşî bi hawayo demokratîke bidomîyo.”
Heto bîn ra şahidê hedîseyî ra xalîzayê kesê ke merdî ra Ahmet Yetkînî dîyar kerd ke AKPyîyî înan ra vatî ‘yan şima rayan danî AKP yan zî şima do bivînî’ û hêriş kerdî û wina va: “Hewl dayî hemînan qetil bikerî. Pî Şenyaşar nêweşxane de çimanê doktor û polîsan de ame qetilkerdiş. Verê tupî reyde dayî sereyê ci ro, dima ra gule veradayî sereyê ci.
RIHA