2’ê Îlonî de dinya bi jew resîmî lerziya.
Badê no resîmî kesî xora û her çî ra şerm kerd. Kesê ke qerarê herb danê û ramenê rê lanet kerd. Badê no resimî nefes girotiş zey guna ame, zerriya kesî vilêşiya. No resîmî de jew qeçek-doman ayseno. Nîme metre ya esto, ya zî çinyo. Peravî de derg biyo, zey ke rakewno. Pelanê zerya bedenê eyê bê ganî eştbi peravî. Tenya bedenê ey nê, yê xeylê kesan eştbi teber. La resîmê ey, bi sembolê pêrokîn penaberan. Ez behsa Alan Kurdî yo 3 serreyî kena. O ke Rojawayê Kurdistan ra, Kobanê ra, herbê qilêrîn ra remya, kena. May û piyê Alan’î vatî qey, şiyayişê hetê Awrupa xelesnayiş o, qeçikanê xo pey xo de kaş kerdî û kewtî rayanê penaberî. La merdişî înan zerreyê zerya de tepişt. Kesê ke zerreyê zerya de fetisyay miyan de, jû pitika 9 aşmî zî estbî. Didi qeçikê diletî, yê ke emrê înan jû serr û nîm bi zî estbî. Kelekê pêrokînan binaw bî; qeçekî, cenî, camêrdî zerya miyan de fetisyay. Bodrum ra waştî şirê girava Kos ê Yewnanîstan û ewja ra zî hetê Awrûpa…
Nika kam do cewabê persa ‘mesûlê merdişê Alan’î kamo?’ bido. Alan û malbatê ci çima Kobanê ra vejyay? Qandê-rîwalê herbî. No herbî kamî vet? Kam rameno, kam destek dano? Eke kes cewabê nê persan bido, xo ra o do sucdaranê kiştişê Alan’î û hezaran kesanê bînî zî bido. Nika welatê Awrûpa bi qrîzê penaberî ra rî bi rî yê. Pêrokînî hawar kenê vanê ma dê se bikerê? Xo ra Yewnanîstan, Îtalya, Macarîstan alarmê taloke çingnenê. Suriye, Irak, Afganîstan, Afrîka û cayanê bîn ra bi se hezaran penaberan verê xo dayo hetê Awrupa. Goreyê îstatîstîkan yê Jûbiyena Awrûpa emserr heta nika 340 hezar penaberî resyay sînoranê welatanê Awrûpa. Des hezaranê ci zî hewna rayan de yê.
Hendayî penaberî welatanê xo ra çima remenê?
Xeylekê ci cayanê ke herb rameno ra yê. Pirodayiş, merdiş, zilm û zorvajî ra remenê. Xeylê ci zî welatanê feqîr û veyşanî ra yê. Jû qiseya verênan esta: Kes veyşan zî, teyşan zî bimano, bimiro zî, gerek hardê xo terk nêkero. Na babedê da bîn a. La nika gerek ma mesûlê nê penaberan û merdişan fehm bikerê. Heta nika bi hezaran kesan rayanê pênabertî de weşiya xo kerdî vinî. Xeylê ci zerya miyan de fetisyenê, xeylê ci kewnê destanê tacîranê merdiman. Veriya çend rojan 80 ra vêşî penaberî Avusturya Viyana de zerreyê jû wesayîtî miyan de, bê hewa mendî û merdî.
Nika tirkiye, almanya, amerîka, fransa, hollanda, îtalya, îngilîstan, rusya û dewletê bînî, şenê vajê eleqeyê ma bi nê penaberan ra, bi nê merdişan ra çinyo? Nê dewletî şenê vajê polîtîkayanê ma yê şaş tesîrê herb, feqîrtî û penaberî nêkerd? Nika ma merdişê Alan’î ra Erdoğan’î mesûl nêgîrê, kamî bigîrê? Alan qandê-serva herbê dostê DAİŞ Erdoğan’î nêmerd, qandê çi merd? Nika Almanya aşkere kena ke îyê dê emserr heta 800 hezar penaberan qebûl bikerê. Hewl dana ke rolê xo yê herb, merdiş û sedemê penabertî binimno. Kes şeno xeylê nimûneyê bînî bido, la hewce nêkeno, raştî werte de yê. Mesûlê penaberî, yê herb, yê feqîrtî, veyşanî no sîstemê sermayedar o. Sermiyanê no sîstemî, serva ke çerxa xo biçerxnê herkesî û her çî feda keno. Omid kena ke, rojanê û wextanê verniya ma de, kesê ke kewnê rayanê penaberî, welatê xo de bimanê û kiştoxan hardê xo ra biterknê. Gunayê Alan’î ser milê kesê ke bî sebebê rayanê penaberî de yo.