Dêyrvaj Deza Amed qijîye xo de muzîk ra eleqeder beno, la semede şertê ciwîyayîşê îmkan nêvîneno ke karê hunerî bikero. Deza Amed, vera pêrunê nê şertan, reyna Newroza 2016 de bi nameyê Welat Ma yew album vejeno. Deyrê (klam) albumî bi temamî kirdkî (dimilî,kirmanckî) yê.Album de Tarîxe xoverdayîşê Kurdistan'î ra pîya kul û dejê şarê kurdî estî. Albumî de roje ma de çi vatiş, heq û edalete ke hewce kenî ca girewtî. Deza Amed o ke 13 serrîya xo de welatê xo terk kerdo, ser hesreta vîst serrî bengî bîyo û îlham girewt o. Bi nê bengî û îlhamî albume ke veta, wayîrê pêrunê vatiş û muzîkê albumî yo.
Tornê Sey Riza û Yado’yî me
Zaraveyê kurdî kirdkî bi qirkerdişî rî bi bî mendo. No halî de yew kirdkî album viraştiş, hembere qirkerdişî xoverdayîşek cewabekê pîl o.Deza Amed na babedî de da zonayen ke, gera vengê şarî hîna bi qewet bo û vist vîrî ke qey (serva) nayî mi zî waşt ke vengê xo hetê heqdarî û xozayî de tewrê xoverdayîşê şarê xo bikerî. Amed’î aşkere kerd ke ma tornê Seyît Riza û Zaza Yado yê û qiseyê xo hina dewam kerd: “Homa (Haq) zano ke, zaf xeletî estî raşt nîyê, ciwîyayîşê ma de estî. Beno ke tayî biwazenê çîyo ke albume mi heq kena, tengîyê albume mi rê vejênê, la reyna albuma me cayêk heqdar gêna. Reyna ez bawerkena ke yê ke waştênê Zazakî album bivirazênê la cesaret nêkerdênê, eyê zî dê cesaret û îlham bigerênê.”
Vera kirdkî neheqî
Derheqê gureyînê kirdkî de Deza rexneyê hunermendanê kurd keno û hina vano: “Hunermendê namedar heta nika yew albumê zazakî nîviraştî, ez nayî sey kemayîyî vînena. Tenya kemayî nîya, qey zazakî yew neheqîya zî. Zazakî çiqas şino hem tayî yeno qiseykerdiş hem zî deyîrên zazakî pê ziwanê bîn amê wendiş. Hunermendanê namedar zî destek nêda zazakî. Wexto ke mi rewşe hina dî, mi rê bi sey şertêk ez zazakî yew album biveja. Na album netîceyê emegê xêlê embazan de virajîya. Verê cû qey zazakî dima ra zî qey mi hurmetî ame nîşandayîş, ez pê zaf qayîl û razî bîya. Ez tayî û zêde heskerdişê xo pêrunê xebatkarê Mîr Muzîk-Multî Medya rê şirawena.”
Deza Amed 10 Êlule 1982 de, qeza ya Xarpêt Dep de dayî bîyo. Albumê ‘Welatê Ma’ de deyrê: “Bê çare”, “Min nizona”, “Yado”, “Dilê mi”, “Oy derdo”, “Dinya”, “Meşo”, “Xuseriqe”, “Welatê pîrîkanê xo”, “Potporî” ca gênê.
ZANA AZADÎ/BRUKSEL