Ecdadê tirkan osmanizî demê Yavuz Sultan Selîm de dest bi qirkerdena aleviyan kerd. Dewleta tirk kî her tim alevî qirkerdî û kena. Dewleta tirkî no kar ecdadê xora dewr guret. Qetilkar Ataturk Qoçgîrî ra dest bi qirkerdena aleviyan kerd, Dersîm de devam kerd, dewa Erzinganî Zînî de vejiya. Ataturk ra dime kî dewleta gonewere Mereş, Malatya, Çorum, Sêwaz, Gazî û Gezî de alevî qetil kerdî.

Ewro kî, demê serdestiya partiya faşîste AKP de no adetê dewleta tirkî rameno. Biyayîsî osnenê ma ke dewlete kisten û qirkerdena aleviyan de israr kena. Hona hefto peyen Okmeydani verê cemxanî de xorto alevî Ugur Kurt hetê polîsanê AKP ra ame qetil kerdene. Serokwezîrê tirkî Recep Tayyîp Erdoganî demê Gezî de hetê polîsanê AKP ra qetil kerdena gencanê alevî, mudafa kerde. Ewro kî qetil kerdena Ugur Kurtî mudafa keno. Niyadayîsê dewleta tirkî her tim niya bî.
Ez nêwazen muqayese bikerî, la alevî en jede demê serdestiya CHP de ameyî qetil kerdene. AKP kî aleviyan rê kerdîsanê CHP xorê jê raye qebul kena û na raye ra devam kena. Zerrê nî 12 serranê peyenan de taye alevian kî poşt dê AKP. AKP demê bi destê Reha Çamuroglu wast aleviyan bionco lewê xo. Tabî aynî o dem de taye aleviyan reyê xo dayî AKP û hona kî danê ci. Cayê jê Dersîm de teşkîlatê AKP estê û îdarekarê xo kî aleviyê Dersîm yê. Jû dugela normale de çiyê niyanenî normal yê. La dugela jê Tirkiye de normal niyê, çike îtîqatê alevîyan hetê dewleta tirkî ra nêno naskerdene. Dewlet û hukumatanê tirkî na derheq de her tim ciyakariye kerde.
Aynî çî seweta CHP kî vêreno ra. Cawo ke alevî weşiya xo ramenê, leto jede reyanê xo danê CHP. Halbike CHP kewta goniya aleviyan. Taye sînemavanê ma 38 sero fîlm virazenê, sonê seweta gala fîlmî serokê CHP Kemal Kiliçdaroglu silayiye kenê. Roştberê ma yê alevî qetlîamanê CHP yê 38 sero kitaban nusnenê, la weçînîtîs de seweta CHP gureyenê. Onca tayê siyasetvanê alevî vanê “Ataturk, yanî CHP fermanê Dersîm do” la ebi xo kî CHP de siyaset kenê.
Ma, alevî kî mixabin jê xêle kurdan na dewleta qetilkare ra nêtexelîme, canêverdame. Çiqaske ma bikiso, onca kî aye dima some. Kurd kî niya rê, alevî kî niya rê. Jû ferqê xo esto ke, letêde kurdan xo rêxistin kerdo verva na dewleta zalime danê pêro. Yê aleviyan hona jû rêxistina xo çîna. Komelê aleviyanê ke estê, leto jede dewlete ra dûrî niyê. Ya lewê AKP derê, ya kî lewê CHP derê.
Dewleta qetilkare letebiyayen û bêrêxistiniya aleviyan rind naskena. Na semed ra kî polîtîka xo yê qirkerdena aleviyan devam kena.