Na nustê xo de hebê vinetîsê aleviyan yê Rojavayê Kurdîstanî sero vinden.

Tabî, waxtoke ez Rojavayê Kurdîstanî van, o ca teyna kurdî nêciwiyenê.
Rojava de, kurdî, erebî, asurî, ermenî estê. Nî însan zî babet babet îtîqatan ra yê. Alevî, sunî, xiristiyanî na hereme de piya weşiya xo ramenê.
Nika herbê zerrê Suriye de pêro nî îtîqatî û kemnetevî yenê YPG ra yardim wazenê. Çike weşiya xo tehlîke dera. Kurdî seweta seveknayena weşiya nînan pêroyîne her çiyê xo kenê werte.
Taye hereman de kurdî ke nêbê, rêxistinê terorîstî jê El Nusra û Iraq Şam Dewleta Îslamî kokê aleviyan anê, vengê aleviyanê ma nêvejîno.
Rêxistina jê El Nusra Suriye de aleviyan sarebirnena, rêxistinanê aleviyan ra vengê nêvejîno.
Bi taybetiye rayverê rêxistinanê aleviyan bêvengî yê. Taye rayverê aleviyan hona zî cerebnenê, ke pêro aleviyan era CHP dime fiyê. Na partiye zî tarîxê xo de xêle alevî qirkerdê.
Kilmek biyarîme xo vîrî: Demê ra avê rayverê qomê kurdî Abdulah Ocalan jû tesbît kerd bî û vat bî, ‘ma hezar serra binê desmala îslamî de ciwiyîme.’
No vatîs ne rindiya îslamî ne zî xiravîya îslamî ser tewa vano. Jû tesbît o.
Na vatîsê Ocalanî ser tayê rayverê aleviyan û roştberî zaf hêrs bîbî.
Halbike Hereketê Serbestiya Kurdî her ca de û her tim alevî seveknê û mazluman rê wayîr vejiyo.
Nî roştber û rayverê aleviyanêke Ocalan honde rexne kerdenê nika sarê xo kerdo qum, cira pize nêvejîna.
Alevî gune mazluman rê wayîr vejiyê û biseveknê!
Hama niyadame, rêxistinê terorîstî Suriye de aleviyan kisenê, sazî û dezgeyanê aleviyan sawo ke werte de çîno.
Kilmek, alevî xorê bîle wayîr nêvejînê. 2-3 cayan de seweta aleviyanê Suriye şiyayîşî viraştî, ora dima cayede numayîs nêvirajiya.
Rayverê ma aleviyan nêzon kamî rê rayveriye kenê?
Niyadê, terorîstê îslamiyêke ewro Rojava û Suriye de kurdan û aleviyan kisenê, Lîbya ra, Tunus ra, Erebîstan ra, Çeçenîstan ra, kilmek her cayê dîna ra yenê.
Ma, aleviyê Tirkiye vame, ma 20 mîlyonîme. Hama nêşîkîme welatê xo de bi şîyayîs û numayîsan aleviyanê Suriye rê wayîr vejîme.
Besenêkeme hukumatê AKP protesto bikeme. Her kes zoneno, ke hukumat û dewleta tirkî Suriye de poşt danê nî rêxistinanê terorîstu.
Na bêvengiye jû lawike ana mi vîrî. Mikaîl Aslan kasetê xoyo newe de vata û qese yê Şex Mehdî yo. Lawike niya ra:
Ez ha belaya, bela ho mina/ez sinî inî tuzbun gen ken inî laya/verg kot muin buelun kutik nêlawa/inî sinî heyat sinî dinyaya.
Na bêvengiyê ero ma aleviyan nêşîkîna.