Kesê ke ser vengdayişê vejyayişê kuçeyan yê Reîscûmhûrê Tirkîye Erdoganî vejyay meydanan taxanê alewîyan zî hedef girotî û gênê. Ser na taloke rêxistinê alewîyan ser vengdayişê Federasyonê Alewî Bektaşî are bî. Roja sifteyin yê kombîyayiş de îdarekarê ABF, peycoy ABF ra pîya rêxistinê alewî, akademîsyenî û parlementerê alewî tewrê kombîyayin bî. Roja peynî de zî temsîlkarê komeleyanê dewan ra pîya bi seyan temsîlkarê rêxistinanê cîya tewrê kombîyayiş bî. Yardimkarê Serokê ABF û Serokê PSAKD Bulent Kayayî netîceyê kombîyayiş DÎHA rê resna.
Aktîf rol kaykenime
Bulent Kaya da zonayen ke şîyayişê vera dîktatorîn ra alewî nêrazî yê û vist vîrî ke kesê ke bin nameyê ‘Pawitişê demokrasî’ de vejyay meydanan cemxaneyan day ver guleyan, taxanê alewîyan de şîyayişî viraştî. Kaya aşkere kerd ke gumanê alewîyan bî vêşî nayî ra ser hewcedarîyan ameyê têlewe.
Kaya vist vîrî ke bi temsîlkaranê sîyasî û akademîsyenan kombîyayişekê rind viraştîyê û wina va: “Alewî hurendîya tekoşîna bi tenya hewcedarîyê bloka demokrasî vînenê. Ma qerar girot, ronayişê bloka demokrasî de aktîf rol kaykenime.”
Cewabekê wertex danime êrişan
Bulent Kaya da zonayen ke alewî kirêşîyenê pirodayişan mîyan û hayr ant kesê ke ser vengdayişê AKP vejyay meydanan ser: “Kesê ke vejyay meydanan serva ke alewîyan bikirêşê pirodayişan dûştê alewîyan êrişî viraştî. Ma nînê enê provakasyonan. Herbê mîyanî do zerar bido şarî. Ma dê na waştena înan qirika înan de biternê. Tekoşîna ronayişê Tirkîyeya demokratîk de ma dê bingeyê sîyasetî esas bigîrê. Ma dê bi leteyanê hera yê cîvakî cewabekê wertex bidê êrişan.”
Kuçeyî faşîstan rê veranêdame
Kaya da zonayen ke roja hîrêyîn yê kombîyayiş de tewrbîyayişê rêxistinanê alewîyan zaf rind bi û aşkere kerd ke alewî ser ABF quweteke hera komkerdîyo. Kaya vist vîrî ke ê rêxistinkerdişeke hera esas gênê û wina va: “Ma kombîyayiş de qisey kerd ke ters û gumanê alewîyan senî êşkenime werte ra wedarime. Ray û raybazî eştî werte. Jûyîna fikir vejya. Ma dê kuçeyan terkê nê komanê çete nêkerê.”
Quwetê dînamîk yê tekoşînî
Bulent Kaya behsê netîce û qeraranê kombîyayişî kerd û da zonayen ke alewî endî bêveng nêmanenê û dê pawitena xo bigîrê. Kaya vist vîrî ke alewî dê meydanan de bê, dê bi quwetanê demokrasî bloka demokrasî ravey berê. Kaya aşkere kerd ke kombîyayiş de ser alewî û kurdan vindîyayê, dûştê asîmîlasyon û înkarî hewcedarîyê ramitişê tekoşîn ardîyayê ziwan. Derheqê hurdî quwetê dînamîk de qerarê tekoşîna wertex ame giroten. Kaya peynîya qiseyanê xo de aşkere kerd ke eke hedefê viraştişê maqeqanûna bingeyîn a demokratîk yê CHP esto se iyê dê veng bidê înan zî û veng bidê pêrokîn hetkaranê demokrasî.
DÎHA/ENQERA