Teqwîmê nûmayişan
13ê Çile de, pêrokîn welatanê Awrûpa de, dê çelengê siya ronê ver konsolosxaneyanê Tirk û damûstayin bidê çapemenî. 19ê Çile de, derheqê binlinkerdişê heqan yê sûkanê Kurdistan, do Mehkemeya Heqê Merdiman yê Awrûpa rê dosya bîro dayen. Eynî roj, ver Parlamentoyê Awrûpa de, damûstayinê çapemenî do bîro dayen û mitîng viraziyo. Bi Konseyê Awrûpa pêdiyayinî viraziyê. 16-17ê Çile ra tepya, bi rayverîna AABF hetê temsîlkariya Eyaleta NRW yê Almanya grevê veyşanî dê destpa bikerê.
Wezîfeyê xo yê tarixî ame ca
Serokî rûmetî yê AABF Tûrgût Oker’î derheq dê nûmayişan de qisey kerd û vist vîrî ke, alewî tenya paşt nêdanê şarê Kurd, xo, cuwyayişa xo û însaniya xo pawenê. Oker’î da zoneyene ke, zihnîyetê 92 serrî yê Tirk-Sûnnî, ser nê hardê qedîm de, destûrê cuwuyayiş nêda şaran û aşkere kerd ke, alewî, verra na barbarîzmî wezîfeyê xo yê tarixî anê ca, pêropiya cuwyayişî pawenê.
Wa herkes nêrazîbiyen damûsno
Tûrgût Oker’î hayr ant binlinkerdişanê dewleta Tirk ser û vist vîrî ke, Tirkiye, hetê îxtidar açarniya zey girotxane. Oker’î ard ziwan ke, cok ra îyenan destpa nûmayişê grevê veyşanî kerd û waşt ke, nê nûmayişî ebi alewiyan ra bi sînor nêmanê û wina va: “Kilîseyan ra heta sînegog û camiyan, gune kesê ke wayrê wijdanî yê nêrazîbiyenê xo damûsnê.
Oker’î da zonayene ke, xeylê hereman de, nika ra nûmayişî destpa kerdiyê. Herzewbîn aşkere kerd ke, hefteya vernî ra tepya nûmayişê bi girseyî dê viraziyê.
Tûrgût Oker’î ard ziwan ke, ebi partiyanê siyasî îye de pêdiyayinan virazê û waştena peynîardina barbarîzmî biresnê.
Bêvengî merdimî dejnena
Heta bîn ra grevê vêşanî yê ke verra qetlîamanê dewlet hetê Komeleya Alewîyê Demokratîk ra ameybî destpakerdiş, dewam kenê. Nûmayişa ke kewt roja 10. rê her ke şino paştîdayişî vêşî benê û çalakî vilayê Kurdistan û Tirkîye benî.
Ceniyê ke Komeleya Alewiyê Demokratîk ê Şaxa Tuzla de grevê vêşanî de yê, ser babedî qalî kerdî. Azaya DAD’ê Husna Kilifli ciresna ke, verra cenazeyê ke 7-8 roje erdî de mendî wijdanê ma do senî rehet bibo û wina vat: “Ma dustê na zilmî qey keye de vinderê û qey bêveng bimanî. Sumbul Betir zî ard ziwan ke Kurdistan de her roje zaf kesî yenî qetilkerdiş û wina vat: “Qetilkerdişî ra zafêr, bêvengîya ke dijî nê qetilkerdişan hîna zafêr merdimî tersnena. Ganî meş û çalakîyê ke yenî kerdişî ra zaf kesî beşdar bibî.”
DÎHA/ENQERA