Bi nizdîbîyayîşê referandûmî cepheyê ‘nê’yî her ke şono hîra beno. Her roje hetê cîya-cîyayî fikrê xo aşkere kenî û seba çi do referandûm de vajî nê, îzeh kenî. Nê hetan ra yewe zî îmamê Amedî yî.Babete ser o îmamê Amedî qisey kerdî û fikrê xo aşkere kerdî.

Yusuf Andan: Prosesêko winasî de çira referandûm yeno viraştiş, seba kurdan manaya nê referandûmî çî ya, wazenî se bikerî? Persê ke lazim î bêrî perskerdiş, nê yî. Serekkomar kurdan ra vano ‘referandûm de rey bidê mi û mi bikerê padîşah’. Çimkî wazeno bibo Yavuz Sultan Selîm. Wazeno 500 serran ra dima gonîya xo teze bikero û hêzêko gird bigiro pey xo. Seserra 21. de bi mîlyonan kurdî bi hawayo kerdoxê înan dîyar nîyî, ameyî qetilkerdiş. 4000 dewî ameyî veşnayîş, ma do seba nînan zî vajî nê. Reyna 4 mîlyon merdimê ma koç kerdî û 60 hezar ciwanê ma bi tanq, top û kîmyasalan ameyî kiştiş, nizdîyê 100 şaredarîyê ma ameyî xespkerdiş, îradeyê 6 mîlyon kesan erzîyayî hepisxaneyan; ma nê hemînan ver vanî nê. Ez tîya ra veng dana heme şaranê cîhanî, eke na keştîye bikewa binê awe, ma heme xeniqîyenî. Na rewşe tena zirar nêdana kurdan, dana ereb, fars, tirk, rûm, îngîlîz û rûsan hemînan. 

Ganî ma têkoşîn bidî 

Mehmet Zorlu: Hukmatê AKPyî seba ke sindoq ra ya bivejîyo, hewl dano şîyayîşê kurdan yê sindoqî ser asteng bikero. Ez tîya ra veng dana heme şarê kurdî, wa vera ‘ya’ de vengê ‘nê’ berz bikerî. Çimkî eke ya bivejîyo, o wext do zulmo ke kurdan ser de hîna zêde bibo. Nika tena ma kurdan ser de nê, ser her hetan de zext û tedayî estî. Homayî Quran de vato ‘eke şima zulmê zalimî het de ca bigirî, cayê şima mîyanê adirî yo’. Erdogan vergêko çermê meşnaye xebetneno yo. Wa ti kes nê zûran ra bawer nêkero. Pêxemberê Homayî hedîsêk xo de vato ‘yê ke hetkarîya zaliman keno, dînê îslamî ra çîyêk fam nêkerdo’. Dînê ma de zulm, dizdî, fuhiş û lengî çin î; edalet, seyyewbînanî û huqûq esto’. Cok ra heme kesê ke xo ra vanî ez musluman û dîndar a, ganî vajî nê.

Dîktatorîye rê Nê

Abdullah Arkan: Serra 2002 ra nata bin nameyê dînê îslamî de rûmetê şarê kurdî ame dagîrkerdiş. Ez veng dana muslumananê Kurdistan û Tirkîya, wa dîktatorîya ke 15 serrî yo ke dewam kena ra vajî nê. Eke referandûm de ya  bivejîyo, o wext do seba bajaranê ma yê bînan zî eynî netîce tehluke esto. Ganî şarê ma na raştî bivîno û referandûm de vajo nê.


MELEK YUKSEL / ANF / AMED