Xeylî bajaranê Almanya de tecrîd û hêrişê dewleta Tirkî yê vera Dayîkanê Aşitîye de ameyî şermezarkerdene û xoverdayîşê grevê vêşanîye û rojeyê mergî ame silamkerdene. Bajaranê Dusseldorf, Frankfurt û Essenî yê Almanya de bi seyan kesî ameyî têhet û çalakîye viraştî.
Bajarê Dusseldorfî yê Almanya de, çalakwanî seba ke bale biancî grevê vêşanîye û rojeyê mergî ser, vernîya Konsolosxaneyê Tirkan de ameyî têhet û çalakîyêk viraşte. Çalakîye de xoverdayîşê Dayîkanê Aşitîye rê wayîr ame vejîyayene. Cinîyan hêrişê dewleta Tirkî yê vera Dayîkanê Aşitîye de şermezar kerd û leçegê sipî eştî xo ser. Parlamentera HDPyî ya Sêrtî ya kehene Besîme Konca zî tewrê çalakîye bîye.
Bajarê Frankfurtî zî hêrişî ameyî şermezarkerdene. Kurdistanijî Frankfurt û bajaranê der û dorî de ameyî têhet û hêrişê vera dayîkan de vernîya Konsolosxaneyê Tirkan de şermezar kerd. Çalakîye de siloganê “Wa bimiro dîktator Erdogan” ame eştene. Bajarê Essenî yê Almanya de zî vernîya Konsolosxaneyê Tirkan de çalakîyêk ameye viraştene. Cinîyan leçegê sipî eştî xo ser û silogananê ‘Do hêrsê dayîkan kiştoxan bifetisno’, ‘Ma do bi xoverdayîşî ser bikewî’, ‘Bê Rayberî cuye nêbena’ eştî. Çalakîye de vilawekî ameyî vilakerdene.
ANF / BRUKSEL