Almanya de 22ê na asme weçînîtîso pêroyî esto. Ma zî, jê xêle însananê bînî bi serran o Almanya de weşiya xo rameme. Endî bîme letedê na dugele. Ma zî gune heqanê xo yê demokratîk na dugele de biyarîme kar.

Bi hezaran însanê ma biye hemwelatê almanî, pasaporta almanî gureta, kamiya almanî gureta. No hal zî taye îmkanan dano ma. Ma besekeme weşiya xo yê Almanya sero qerar bidimê, qederê xo bicerîme xo dest. Nînan ra jû zî heqa weçînîtîs ya. Kam ke biyo hemwelatê almanî, besekeno bêro weçînîtene û weçîno. Nî heqî zaf muhîm yê. Yê kamî ke na heqa xo esta, gune bîyaro kar û şero sandiqe. Bi taybetiye seweta kurdan na heqe kar ardene zaf zaf muhîm a. Çike reyê mordemî vengê mordemî yo. Bi rey dayene mordem beno wayîrê qeşî.  
Dewleta almanî hata nika her tim poştî polîtîka dewleta tirkî ya qilêrine. Dewleta almanî herbê qilêrin de lewê dewleta tirk de ca guret; çekî dayî ci, pereyî dayî ci, rêxistinê kurdî, çapemeniya kurdî kerdî qedexe. Partiyê ke hata nika bîyê serdest pêroyîne zî sazî û dezgê kurdî kerdî qedexe, poşt da zulm û zorvajiya dewleta tirkî.
1993 hukumatê CDU/CSU û FDP rêxistinê kurdî kerdî qedexe. No qedexe hata ewro hona rameno. Yanî nî partiyan seweta kurdan çiyo rind nêkerd, poştî wastîsê kurdan yê serbestiye nêda. Nî partî ewro zî serdest yê û polîtîka xo ya xiravine verva Kurdan devam kenê. Na semed ra ez reyê xo nî partiyan nêdan.
Bêrîme partiyanê bînan. 1998 onca weçînîtîs bî. Partîya SPD û partiya Kesku ra piya bî serdest û hukumatê xo na ro. Nî partiyan zî demê serdestiya xo de devam ra poşt dê herbê qilêrinî yê dewleta tirkî yê verva kurdan.
2005 SPD û Kesku ra hukumat de bî. O waxt zî hukumatê SPD û Kesku polîtîka qedexekerdene ramite. 2005 bi fermanê na hukumatî polîsî onca est çapemeniya kurdî ser, ajansa xeberan û rojnama kerdî qedexe. Seweta mi SPD û Keskî zî reyê ma heq nêkenê. Ez reyê xo nî partiyan nêdan. Onca qanunê “Hartz 4”  zî hukumatê SPD û Kesku virast, feqîr fiqare vêsna.
Peyde teyna “Dîe Lînke” mende. Hata nika serdest nêbiya. Nêzoneme, eke serdest bo se kena. Hama hata nika meclîsa Almanya de seweta heqanê kurdan xêle kar û gure kerd, poşt dê wastîsanê kurdan. Weçînîtîsê 22ê na asme de Ayten Kaplan, eyaletê Vestfalîya Bakur (NRW) de partiya “Dîe Lînke” ra seweta meclîsa Almanya biya namzet.
Ayten Kaplan cematê kurdan de rind yena naskerdene. Ma na raya gune “Dîe Lînke” bicerebnîme. Reyanê xo bidîme “Dîe Lînke”.