ROZA MIHEMED/ROJNEWS SILÊMANÎ Siba do Başûrê Kurdistanî de bi siloganê ‘Problemê Ciwanan û Rojhelato Mîyanên de Çareserîya Demokratîke’ konferansêkê ciwanan bêro viraştiş. Seba konferansî amadekarîyê peyênî temam bîyî. Konferans do Salona Tewarî de bêro viraştiş û rojêk dewam bikero. Konferans de problemê ciwanan ser o bêrî vindetiş. Do problemê ciwanan, çareserîyê ci, pêşnîyazê çareserîya demokratîke yê Rojhelatê Mîyanênî, rêxistinbîyayîş, ekonomî, kooperatîf, ekolojî û sewbîna babetan ser o munaqeşeyî bêrî kerdiş. Seke yeno zanayîş 22ê Nîsane ra nata Komîteya Amadekarî ke 15 kesan ra pê yena, xeylê welatan de xebetîyena. Ame musayîş ke rêxistinê ciwanan yê Rojhelatê Mîyanênî, rêxistinê ciwanan yê partîyan ameyî dawetkerdiş. Komîteya Amadekarîye heta nika Îraq, Sûrîye, Lubnan, Urdun, Lîbya, Îran û sewbîna welatan ra xeylê kesî dawet kerdî û yeno pawitiş ke tewr kêmî 300 kesî do beşdar bibî.