AYSEL IŞIK / JINNEWS/RIHA
Oseba şarê kurdî ver bi dewa Amaraya ke cayê akewtişê tîje yena qebulkerdiş şonî. 9ê Teşrîna verena 1998î de Rayberê Şarê Kurdî Abdullah Ocalan bi komployêka mîyanneteweyî Sûrîye ra amebî vetiş û dima ra teslîmê Tirkîya amebî kerdiş. No teslîmkerdiş hetê şarê kurd û bitaybetî zî hetê cinîyan ra bi hawayo wişk amebî protestokerdiş. Çalakîya ‘Şima nêşenî Roja ma tarî bikerî’ ke rayberîya ci hepsîyê ke zindan de bî kerdêne, dormeyê heme ca sey guda adirî girewtbî. Domanîya Rayberê Şarê Kurdî û erdê ke meymandarîya xeylê şaristanan kerdî de şopê xeylê şaran estî.
Tîje yena vatiş, ya Amara de akewtiş û şîyayîşê tîje zaf cîya yo. Tîya de her nesil ra merdimî Ocalanî nas kenî. 7 serreyî ra heta 70 serreyî ziwan û bawerîya ci se beno wa bibo, vanî ‘ma dî, ma eşnawit’. Cok ra şar Ocalanî sey ‘Tîje’ şinase keno. Çimkî nê erdan de cuye xeylê zehmetin o û eyî zî her nesil ser de sey tîje akerdo.
Wexto ke ez ziqaqanê dewe de gêrayêne, verê ke ez biresa keyeyê Ocalanî, ziqaqêko teng eleqeyê mi anceno. Ez wazena ke fotografê ci bianca. Zerrîya ma heyecan ra keno ke bifiro. Çimkî ma zanî ke hişyarbîyayîşê şarêkî ê ziqaqan de zîl da. Nê ziqaqî eynî wextî de ziqaqê ke Rayberê Şarê Kurdî vatbî ‘mi îxanetê xeyalê domanîya xo nêkerdî’ bî. Dima ra ma vera xo danî keyeyê Ocalanî. Wexto ke ma bere hewşî akerd, şopê têkoşînî yê sifteyînî vejîya vera ma. Hewşo ke nêameyo kîlîtkerdiş de herkes eşkeno bikewo mîyan û ewja de nefes bigîro. Ma vanî nefes; çimkî dîyar o ke ewja de tengbîyayîşî rê destûr çin o…
Bêrîkerdişê domanan yê ke nêqedîyenî
Wexto ke ma mîyanê dewe de gêrayêne, ma raştê domanê ke mektebî ra vejîyayî ameyî. Domanê ke cêrê keyeyî de kom bîyî, agêrayî û m a ra vatî ‘şima zanenî, tîya keyeyê Abdullah Ocalanî yo’. Wexto ke ma domanan reyde sohbet kerdêne, ma persê ‘gelo şima Abdullah Ocalanî kura ra şinasnenî?’ kenî. Ê zî pêro pîya vanî ‘keyeyê ma şinasnenî, wextê rojbîyayîşê ci de ma pîya pîroz kenî’. Nê vatişî zî bi hîsê bêrîkerdişo ke qehremanêkî rê yeno hîskerdiş vanî.
Sey hebeyanê hinarî
Dewa ke hema fikre feodalî tede hakim o de êdî cinîyî wayîrê vatişî yî û wexto ke ma nê vînenî, ma rê zî baş yeno. Dewe de bêxera kurdan tirkmenî zî estî. Tirkmen û kurdî sey fikrêkî de kom benî. Ma bi hawayo tesadüf kewenî keyeyêkî mîyan û raştê cinîyêka tirkmen yenî. Na cinîye qala tesîrbîyayîşê xo yê Ocalanî ra kena û dîyar kena ke felsefeya Ocalanî hêz dayo aye. Nê vatişê cinîya tirkmenî bala ma anceno: “Şima na dewe de zafbîyayîşê hinarêran vînenî nê? Wexto ke Abdullah zî şenik bî, tim hinar arê dayêne. Prosesê hinarî zî raştê demserra hinaran yeno. Ma de hinar sembolê bereket û yewî yo. Cok ra bindestî sey hebeyanê hinarî dormeyê fikrêkî de kom benî.”
‘No têkoşîn do qezenç bikero’
Herçiqas ke 19 serrî Sûrîye ra vejîyayîşê Ocalanî ser ra derbaz bîyî, labelê reyna zî merdim tesîrê roja sifteyîne şarê dewe ser de vîneno. Dewijan ra tayê qala rojanê grevê vêşanîye kenî, tayê zî qala çalakîyanê bitesîr kenî. Embaz, dewij û kesê ke Ocalanî reyde eynî ziqaqan de kay kerdî, qala tecrîdî kenî û rewşa bêvengîye ra eciz î. Her keyeyo ke ma ti ra vejîyenî de mesajê ‘no têkoşîn do bi tesilî qezenç bikero û no zî ancax saya Ocalanî de beno’…