Amed hadreyîya kongre keno
Bînbîr vat ke ê zanenî ke armancê AKPî, HDP têkberdiş o, îqtîdarê AKP û MHPî teberê huquqî de hêrişê HDP keno û dîyar kerd ke seba têkberdişê îqtîdarê AKPî, stratejîya xo tifaqa demokrasî ser o awan kerdê.
LÊL AMED / AMED
23’ê sibata 2020î de HDP do Enqere de kongreya xo ya bi heybet bivirazo, HDP demo newe de stratejîya xo ser ‘Tifaqa Demokrasîya Bi Hêze’ awan kerdo. Nika îqtîdarê AKP Û MHPî krîzêko gird cuyeno, vera no îqtîdaro faşist zî HDP qezencê aşîtî, azadî, edelet û demokrasîye ser o têkoşîn dano. HDP do têkoşîn bido ke Tirkîya de tifaqa demokrasi awan biba. HDP de nika pêvînayişan komîsyonê mutabakatî virazeno û no komîsyon heyetê PM û desteye de rêbaza di demî şuxilneno. Hewna HDP Rayberîya Kurdistanê Başûrî, partîyê welatê Rojhelatê Mîyanên ra zî selayîname erşawito û hepisxaneyan ra zî seba bi hêzvîyartişê kongreye têkilî yeno ronayiş.
Amed de rêxistinê bajar û qezayê HDPî zî bi coş û kelecanî hadreyîya kongreya xo ya bi heybet kenê. Nika bi hezaran kes ser piro rêxistinê qezayê HDPî kerdî ke Enqere de beşdarê kongreya gird bibî. Hadreyîya kongreya bi heybet ser o Hetkarê Hemserekê HDPî yê Amedî Edîp Bînbîr agahî da.
Hetkarê Hemserekê HDPî yê Amedî Edîp Bînbîr vat ke Enqere de do Kongreya Asayî ya 4’ine ya HDPî bivirazîyo, na babete de HDPê Amedî dest pê xebata xo kerdo û wina vat: “Armancê ma kongreya bi heybet ra 2500 kesî reyde beşdarbîyayiş o. Nika tax bi tax, kuçe bi kuçe rêxistinê ma yê qezayî xebatê xo kenê. Na kongre demo bi zor û zehmet de yena viraştiş, no dem de taybetî HDP ser o teda û zilm zêdîyayo. Ma zanenî ke faşîzmê AKP û MHPî taybetî heme kurdan, arizî zî HDP xo ra hedef girewto. Ma wazenî kongreya ma bi coş û kelecanî bivîyaro, no ser zî ma xebatê xo domnenê.”
Stratejîya ma demokrasî ser o ya
Hetkarê Hemserekê HDPî yê Amedî Bînbîr bal ont armancê kongreye ser o û wina domna: “Ma mîyanê demî de stratejîyêk dîyar kerd, ma bi na stratejî 31’ê adara 2019î ya Weçînayişê Xocayî de tifaqa AKP û MHPî şaredarîyê bajarê girdan de tepa vist. Ma zanenî ke armancê AKPî, HDP têkberdiş o, AKP teberê huquqî hêrişê ma keno. Ma seba têkberdişê îqtîdarê AKPî, stratejîya xo tifaqa demokrasî ser o awan kerd. HDP do fek stratejîya xo ra vera nêdo. Îqtîdarê AKP û MHPî wazeno ke HDP tena na mintiqa de siyaset biko la ma aşkera vanî ke tena mintiqa de nê, çimkî HDP partîyêka Tirkîye yo, no ser zî do ma pêroyina Tirkîya de sîyasetê xo bikê. Ma sîyasetê xo heme hêzê demokrasî reyde tifaqe ser awan kerdo, ma xebata xo no ser kenê.”
AKP bi aşkera wazeno heyf bigo
Bînbîr aşkera kerd ke nika Tirkîya de krîzêko bi gird esto, seba ci zî stratejîya HDP a şaredarîya bajarê girdan de serkewt bî, hewna na stratejî ra do dewam bikê û wina dewam kerd: “Na kongreya ma do seba têkberdişê faşîzmî bibo kerraya mîhenkî. Nika çimê her kesî HDP ser o, çimkî zanenî ke HDP do sîyasetê Tirkîyaye dîyar biko. Na kongre de qadroyê bi hêz ra avzelî esta.”
Demokrasîya bi hêz ser o têkoşîn
Bînbîr bertek nîşanê tayînkerdişê qeyiman kerd û wina qedîna: “Amed de nêzdî seyî ra 70î reyde şaredarê ma ray girewtê la belê 5 aşmî ra pey qeyim tayîn kerdê. Îqtîdarê AKP û MHPî aşkera vano ke ma îradeya şarî nêşinasnenê û qeyim tayîn kenê. Peynîya tayînê qeyimî, şaredarê ma eştî hepisxaneyan. AKP bi aşkera HDPî ra heyfê stratejîya tifaqa demokrasî gêno, çimkî şaredarîya bajarê girdan de AKP têk şî. Nika komîsyonê ma yê mutabakatî her kes reyde pêvînayiş keno, ma bawerî ke kongreya ma bi hêz û weçînayişê qadroyê hêz reyde bivîyaro. Ma sazîyê pêrabesteyî reyde zî xebata xo kenê, ma çar parçeya Kurdistanî de yewbîyayişê kurdan ser o zî xebata kenê. Ma do demokrasîya bi hêz ser o têkoşînê xo bidomnê.”
