Avûkatanê Rayberê Şarê Kurdî Abdullah Ocalanî 8 serran ra dima şêna muwekkîlê xo reyde pêvînayîş bikerî. Pêvînayîş de mesajê qedênayîşê çalakîyan ame dayene û krîzê Sûrîye de zî qala çareserîye ameye kerdene.
Hemserekê Partîya Yewîya Suryanîyan Senherîb Bersumî da zanayene ke bi fikrê Ocalanî eşkenîyo ameyoxê Sûrîye bêro dîyarkerdene. Bersumî dîyar kerd ke êdî problemî bîyî girê û cayê sey Astana û Cenevre ra zî çareserîye nêvejîyena. Bersumî va ‘ti tesîrê dezgehanê mîyanneteweyîyan herême de nêmendo’ û wina domna: “No zî do hîna zaf nakokîyan xo reyde bîyaro. Eke Ocalan înîsîyatîf bigîro, problemê Sûrîye û Rojhelatê Mîyanênî do bêrî çareserkerdene.”
Bersumî bale ant mesajê Ocalanî yê 2015î ser û wina va: “Ez fikranê Ocalanî yê derheqê Sûrîye û Rojhelatê Mîyanênî teqdîr kena. Ma eşkenî bi fikranê Ocalanî Sûrîyeya ke heme fikir, reng û îradeyan mîyanê xo de hewênena, awan bikerî. Ma eşkenî bi fikranê Ocalanî ameyoxê Sûrîye dîyar bikerî. Ocalanî mesajê xo de dîyar kerdbi ke krîz ancax girîyayîşê heqanê şaran yê binê temînatî çareser beno. Dewletê ke tek ziwan û faşîzmî esas gênî, benî sebebê krîzî. Ez veng dana heme şaranê Sûrîye ke wa wayîrê fikranê Ocalanî bivejyî. Çimkî eke Ocalan înîsîyatîf bigîro, krîz û şer qedîyeno.”
ANHA / QAMIŞLO