Hawt roj ju meyit serê raye de manno. Ez nêwazen hurînda domonê dayika Taybet de bi. Dest berjê wijdano xu ser. Xu hurînda domonenê dayika Taybet kere. Nû sene dezo, nû sene zilmo, maya sima nanepira, sima nêskîne maya xû biyarê çê xu, bipilêsiyê maya xora, cira xatir biwazê. Nêverdanê defena destê maya xu lew kerê, cira helaliyê biwazê.
Nayî ra hin zilmo girs esto? Ez nêzon. Maya sima benê kenê mezele, beka qe mezelekî nêkerda, xebere nêdenê sima. Sima nêzanenê, sutê, duayaye dê ci. Qe xebera sima çîna, sima nêverdanê sere lewe maya xu. Ekîn Wan kisenê, meyit erzenê sere raye. Meyit kene rûti. Kaye xu kenê, çimone ma kirmoncu ver de şekene vanê, ma niya rûmetê sima cenime bine lingo.
Xeberu wanen me. Diten gênc ne pira. Meyit nê gencu binê vore de mendê. Kes nêşkîno sero meyitone xu bicere, sere meyitone xo de bibermo, loqmê meyitone xu bido. Sîlopî de hîrê tên cenikî. Ju melara wazenê şêre mela binê. Dewlete rayede nanapira. Nî hîrê cênikî benê dirbetin, hevalone xorê telefon kenê, vanê “ma bimê dirbetin, ma naymê pira, ma bicêre, ma gonî kênime vindî. Dewletê ambulans nêrusnena, hewalê xu wazenê ambulans birusnê, dewlete nêverdana birusne. Peydona xebere yena vane, meyitê hîrê cêniku arde nêwesxane. Dewlete nî hîrê cêniku infaz kena.
Miyanê kişteyan de, hona pitika 30 rojî Mîray estbî. Hona çimê xu dina rê nîkerd bê ra. Hona dormê xu rind nêdî. 30 rojî biyê, kiştî û meyitê na pitikî hona nêda ma û pîyê ci.
No herb murdaro, na dewlete murdara. Her roj sûcê herbîn kena. Sivîlan qir kena. Çê sivîlû kena xirab. Sukî bombevaran kena, û kena tol-veng. Ez tirko rê perskena: ‘Eke sima kirmonc bê, sima dê sekerdenê? Eke Taybet maya sima, Ekîn Wan waya sima, Mîray domone sima biyenê, sima dê sekerdenê? Ya kî sima ra pers kon, sima gore kirmonc çi bikerê, destanê xû vero xode girêdê, na zilm dê şêkere, nîwazenê? Sima hurinde kirmoncû de çi kerdene sê, ewru kirmoncî êyî kenê. Kirmonc nêwazenê domone dinê bikişiyê. Çodir nika poşt danê domononê xu, sima fam nîkenê, belkû fam kenê, hama saba domonenê kirmoncu rê ju dilopê istira sima nena.
Ez onca von, zilmo ke kirmoncu vînit, heq nêdo keşî. Îye ke na zilm kirmoncu rê layiq vînenê, wa o zilm bêro îye nê ser, wa î kî na zilm bivînê, wa bero sêre dine.
Ûsene GIRMIT