Hem welat de hem zî teberê welatî de, seba Kobanê hima zî çalakîyî yenî organîzekerdiş.Heme kes zano ke, kobanijan hêrişê (gala) yewerî nêkerdo. Vera wahşetê DAIŞî, welatê xo pawenî. Kurdî wazenê ke; Rojhilato Mîyanên de yew pergalêko demokratik awan bikî û Rojhilato Mîyanên de mensûbê heme şaran, dînan û mezheban, heme fikran û bîr û bawerîyan, xo bi azad îfade bikî (bikerî).
DAIŞ ê xo vêşêr yewna mezhebî, yewna dînî û bîr bawerî qebul nêkeno. Mensubanê sewbîna mezheban, dînan û fikran se dişmen veyneno. Qetlê înan wacîb veyneno. Destnano mal û mulkê înan sîyar. Cinîyanê înan zî xo rê helal veyneno. Bazaran de cinîyan û keynekanê înan roşeno. No dewr de, no feraset nîyno qebulkerdiş. Yew het ra vanê ma seba dînê îslamî cîhad kenî, yewna het ra DAIŞî, Mûsil de, Telefer de, epey mezelî, tirbî û camîyê şîîyan bi dînamîtan û mayînan rijnayî. Tewr peynî zî rojhilatê Kobanê de, yew camî îşgal kerd û no camî, se qerergehe şuxulna.
Bi verxodayîşê YPG/YPJ no camî ra remayî, xo dima zî no camîyê kobanijan bi mayînan xirabe kerd. Nê çeteyê dînê îslamî seba menfeet û îqtîdarê xo şuxulnenî. Rojhilatê Mîyanên de, îslamo radîkal, bi tekbîran yewbînan û şaranê binan qetl kenî.
Ewta de yew şaşeya pile esta. Rojhilatê Mîyanênî de, heme meseleyi, ancax bi diyalog û muzakereyan çareser benî. Bêkiştiş, talankerdiş yewna stratejîyê DAIŞ çin o. Êrişê kurdan û şaranê binan keno, dest fîyneno namûsê kurdan û şaran, welatê înan îşgal keno, merdiman ganî-ganî serebirneno. Tena kurdan qetil nêkeno, şaranê Amerîka, Ewropa û heme şaranê dinya; bi kiştiş û serebirnayîş û rotişî tehdît keno. Rojnamegeran û merdimanê înan bi kardîyan serebirneno.
YPG/YPJ, peşmergeyî û şerwan Ordûyê Sûrîye yo Azad, vera no wahşetê têkoşînêka bi qehramnî danî. Mutlaq ko nê çeteyan, kobanî ra pank bikî. Nika zî aseno ke çeteyê El Nûsrayî wazenê ke, Kantona Efrîne îşgal bikî (bikerî). Na saete ra pey ne kurdî, ne zî şarê dinya hinê nê îşgalî qebul kenî. DAIŞî ra vîyar ma wahşetê El Nûsrayî zî xo çiman vîyar de dîy. Nê çeteyan zî wahşetê xo medyaya cîhanî de neşr kerdbi. Yanî El Nûsra zî wazeno welatê kurdan îşgal biko. La esla no amancê înan zî nîyno ca. Kurdî Rojawan de û Vaşûr de yew têkoşîna merdimanî danî. Kurdî û şarê dinya, vera nê wahşetê nê çeteyan bêveng nêmanenî. Peynî de merdimanî qezenc kena.
Mamoste SILÊMAN