Bi destdayîşê kurdê xayînan welatê ma yo bi bereket ke Homay mîyanê erdnîgarîya Mezopotamya de ma rê bexş kerdibi kewt binê simê estoranê dagirkerê zaliman.
Çi heyf ke ay zalimê ke dîroka gunî ra verê lînganê şarê ma de viste ra, bi destdayîşê xayînan hema zî estişê xo erdnîgarîya ma ya pîroze ser de domnenê.Wexta ma mîyanê dîroka nûştî de ro rêçanê destpêkerdişê îxanetî geyrenê Enkîdû kono çiman ver û o qodê yê şexsê Yezdan Şêran de, Kasiman de, Rayberan de, ajanê bêmardeyan û cehşê cerdevanan de û heta rojê ma yê eyroyînî de şexsê hîzbîkontrayan de verdewam keno.
Semedê her wextî û her serrewedartîşêke kurdan, îxanetî bi rengê cîya cîyayî xo dîroke de dayo nûştişî. Hînke tersan ver bîyê koleyê dagirkeran, hînke semedê di quruşî peran, hînkan rê qiwetê siyasî ameyo dayîşî û hînke zî bi maskeyê dînî konê sehnî ser û heta ke îne ra yeno bi destdayîşê zaliman gengeşî fînenê mîyanê şarê ma yê ke hemverê zilmê zaliman tekoşîna mafanê xo yê merdimahî danê.
Her ge boye serkewtişî welatê ma ra yena zalimî ca de xayînan fînenê dewre û heta ay xayînan ra yeno emrê zaliman pêk anê.Eke eyro roc welatê ma mîyanê çar dewletê zaliman de bîyo çar perçey, sebebê ay awayî yo yewin paştîdayîşê xayînan o. Çar dewletê ke bîyê sebebê felaketê Mezopotamyaya rengîne û kurdan ser de zilmêko bê hed û bê hesab pêk anê çimeyê xo xayînan ra gênê. Wexta ma îxanet ferhenga xo ra vet go o wext welatê ma dagirkeran ra zî pak bibo.Wexta ma her dewlete ra finakêko kilm bidê go kilmeya anyayîşê her çar dewletan a kurdan ser bimojno ra. Go bêro dîtişî ke dewletê bi çi awayî û bi çi fikrî kurdan ser de hikim kenê. Finake yewine ma Îran ra bidê ke qaşo dewletêka îslamî ya.
Şoreşgera kurd e Şîrîn Elemhûlî wexta hetê Îranî ra ke zirarkarêke îslamîyetî yo bi îdam amî hikimkerdişî bi îdîaya ke ‘bakîreyî şinê cinet’ vero ke bêro îdamkerdişî amî tecawizkerdişî. Dewleta Îranî ya ke çîke ya û îslamî pêwa çinîyo bi ay kerdişê xo mot ra ke bi ya bimano go hurdî dinyan zî ro kurdan bikero cehenem.
La wa baş bizano ke bi ay awayî ya cay xo cehenem de visto ra.Dewlete Îraqî bi kerdişanê Sedemî mirad û mexsedê xo yê kurdan ser de heme dinya rê moşt ra, Tirkiye her tim polîtîkaya ‘kurdan bi kurdan bide qirkerdiş’ ramita û bi ay awayî heta nika bi hezaran kurdî kerdê binê herrî. O kulturê înan eyro serê hîzbîkontran ra pêk yeno. Hîzbîkontrayê ke serê nameyê dînî de paştî danê zaliman û pêdir serê şarê ma yê mezlûmî de yenê.Dewlete Sûrîye ke bi polîtîkaya xo ya înkarî kurdê Rojawanî bê nasname verdaybî eyro roj bi wehşetêko pîl ke bi canîyanê DAIŞî pêk ana kurdan ser de yena.
La hemverê zilmê enî herçar dewletan zî eyro roj bi saya tekoşîn û xoverdayîşê gerîla û şoreşgeranê ma yê qehremanan firsetêke pîl nizdê kurdan bîyo. Û ma bawer kenê ke go Homa qiwet bido ma.

Nesrîn NAVDAR